Հայերը քվեարկեցին վճռորոշ ընտրություններում, որոնք կձևավորեն Հարավային Կովկասի երկրի և ամբողջ տարածաշրջանի ապագան․ միջազգային մամուլի ամփոփում
Նիկոլ Փաշինյանի կուսակցության հաղթանակը խորհրդարանական ընտրություններում չի նշանակում, որ հայ հասարակությունը ներել է նրան Ղարաբաղի կորստի համար կամ անվերապահորեն աջակցել է նրա կուրսին։ Ավելի շուտ այն ցույց է տալիս, որ նախորդ անվտանգային համակարգի փլուզումը տեսնելով՝ ընտրողների զգալի մասը դեռևս չի տեսել որևէ համոզիչ այլընտրանք ներկայիս վարչապետին․ գրում է BBC-ի ռուսական ծառայությունը։
Ինչպես նշվում է, Փաշինյանը հաջողության է հասել ամենակարևորում՝ կառուցելով մի պատմություն, որտեղ ընտրությունը ոչ թե իր և իր հակառակորդների միջև էր, այլ պատերազմի և խաղաղության։ Արդյոք այս ընտրությունն իրատեսակա՞ն էր՝ այլ հարց է։ Ընդդիմությունը, սակայն, պնդում է, որ կառավարությունն իր քարոզարշավն իրականացնում է ոչ միայն քաղաքական միջոցներով, այլև ուժով։ Այս մեղադրանքները պայմանավորված էին Փաշինյանի քննադատների նկատմամբ հարուցված քրեական գործերով և ձերբակալություններով։
Euronews-ը գրում է, որ հայերը քվեարկեցին վճռորոշ ընտրություններում, որոնք կձևավորեն Հարավային Կովկասի երկրի և ամբողջ տարածաշրջանի ապագան։
The National Interest-ը գրում է, որ հայերը քվեարկեցին խորհրդարանական ընտրություններում, որոնք բավականին ճշգրիտ նկարագրվել են որպես երկրի աշխարհաքաղաքական ուղղության վերաբերյալ հանրաքվե։
Շրջադարձն արդեն տեղի է ունեցել։ Ընտրությունները կորոշեն, թե որքանո՞վ է այն կայուն, այլ ոչ թե արդյո՞ք այն տեղի է ունեցել։
Այն, ինչ Վաշինգտոնը կանի ընտրություններից հետո, շատ ավելի կարևոր կլինի, քան նախկինում արված ամեն բան։ Ընտրությունները կորոշեն, թե որքան արագ են փոփոխությունները դառնում մշտական, այլ ոչ թե արդյոք դրանք կշարունակվեն։ Դրա կարևորությունը Միացյալ Նահանգների համար ավելի բարձր է, քան երբևէ, բայց ամերիկյան ուշադրությունը սովորականից ավելի բաժանված է։ Բարձր խաղադրույքների և սահմանափակ ուշադրության այս համադրությունը հենց այն դեպքն է, երբ ընտրություններից առաջ դրամատիկ միջամտությունը կարող է հակառակ արդյունքը տալ։
Մոսկվան ցանկանում է Փաշինյանին ներկայացնել որպես արևմտյան նախագիծ, այլ ոչ թե որպես հայկական ընտրություն։
