ՀՀ վարչապետից կառուցողական ու հավասարակշռված մոտեցում էի սպասում․ Գերմանիայի թեմի առաջնորդ
Հայաստանի Հանրապետության վարչապետից սպասում էի ավելի հավասարակշռված և կառուցողական մոտեցում․ ասել է Գերմանիայի թեմի առաջնորդը՝ անդրադառնալով Հայ առաքելական եկեղեցու շուրջ ընթացող քննարկումներին։
«Ես սպասում էի, որ Հայաստանի Հանրապետության վարչապետը շատ ավելի տարբեր մոտեցում կունենար եկեղեցու վերաբերյալ։ Եկեղեցու բացթողումները, եթե այդպիսիք կան, պետք է քննարկվեն եկեղեցու ներսում, քանի որ եկեղեցին ունի իր կառույցներն ու մարմինները, որտեղ նման հարցերը լուծվում են», – ասել է Գերմանիայի առաջնորդ Տ․ Սերովբե եպիսկոպոս Իսախանյանը։
Նրա խոսքով՝ եթե վարչապետը, ինչպես ինքն է հայտարարում, Հայ եկեղեցու հավատացյալ հետևորդ է, ապա պետք է շահագրգռված լինի, որ եկեղեցական խնդիրները կարգավորվեն բացառապես եկեղեցու սահմանված կարգ ու կանոնների շրջանակում։
«Ես չեմ ցանկանում կասկածել վարչապետի հավատքին, սակայն եթե նա իսկապես իրեն տեսնում է որպես Հայ եկեղեցու հետևորդ, ապա պարտավոր է հարգել մեր եկեղեցու դրված կարգն ու կանոնը», – ընդգծել է Գերմանիայի թեմի առաջնորդը։
