Հայերն ընտրություններում կլուծեն շատ ավելի հրատապ հարցեր, քան «Պուտինին ամուսնալուծության համար դիմելն է»․ BBC
Հայաստանում խորհրդարանական ընտրություններից մեկ ամիս առաջ Վլադիմիր Պուտինը հրապարակավ Երևանին ընտրության առաջ կանգնեցրեց՝ բարեկամություն Եվրամիությա՞ն, թե՞ գործընկերություն Ռուսաստանի հետ։ Եվ որպես նախազգուշացում՝ հիշատակեց Ուկրաինան։
Մոսկվան նախկինում հայտարարել էր, որ Հայաստանը չի կարող միաժամանակ շարժվել դեպի ԵՄ՝ մնալով Եվրասիական տնտեսական միության մաս։ Սակայն այժմ Պուտինն այս ուղղությունը կապեց ուկրաինական սցենարի հետ, և դա արեց քվեարկության նախօրեին, որը կարող է դառնալ ոչ միայն նոր կառավարության, այլև երկրի ապագայի վերաբերյալ որոշում․ գրում է BBC-ն։
Հենց այս կապն էր՝ Հայաստանը, ԵՄ-ի և ԵԱՏՄ-ի միջև ընտրությունը, Ուկրաինան և «պետք չէ ծայրահեղությունների հասցնել» արտահայտությունը, որոնք Պուտինի խոսքերին հաղորդեցին սպառնալից երանգ։
Ֆորմալ առումով Ռուսաստանի նախագահը չասաց, որ Հայաստանը կբախվի ուկրաինական սցենարի։ Սակայն նրա պատասխանի քաղաքական իմաստը հենց դա էր. եթե այն երկիրը, որը Մոսկվան համարում է իր ազդեցության ոլորտի մաս, ընտրի եվրոպական ուղղությունը, հետևանքները կարող են ծանր լինել։
Ըստ լրատվամիջոցի հետ զրուցած հայ փորձագետների՝ Վլադիմիր Պուտինի հայտարարություններն ակնհայտորեն սպառնալիքի նման են հնչում։ Պուտինի դիտարկումները երկու երկրների տնտեսական կապերի և հայ ժողովրդի համար օգուտների մասին ակնարկ են այն հնարավոր էներգետիկ պատժամիջոցների մասին, որ Ռուսաստանը կարող է կիրառել Հայաստանի դեմ։
Ֆորմալ առումով Պուտինի մեջբերած թվերը համապատասխանում են իրականությանը, բայց համեմատությունը լիովին ճշգրիտ չէ. Պուտինը համեմատել է Հայաստանի համար ռուսական գազի երկարաժամկետ գինը եվրոպական ֆոնդային շուկայի անկայուն գնի հետ, այլ ոչ թե համեմատելի երկարաժամկետ պայմանագրի։ Մասնագետները չեն կարծում, որ Ուկրաինայի հետ համեմատությունը նշանակում է, որ Վլադիմիր Պուտինն իրականում սպառնում է ռազմական ուժ կիրառել Հայաստանի դեմ։
Երևանը համաձայն չէ, որ Հայաստանը պետք է հիմա ընտրություն կատարի ԵՄ-ի և ԵԱՏՄ-ի միջև։ Միևնույն ժամանակ՝ Փաշինյանի հակառակորդները մեղադրում են վարչապետին պարտության, Բաքվին զիջումների գնալու և Մոսկվայի հետ հարաբերությունները խզելու համար։ Չնայած տարբեր գնահատականներին՝ փորձագետները համաձայն են, որ առաջիկա ընտրությունները Ռուսաստանի կամ ԵՄ-ի մասին չեն, այլ հիմնականում Հայաստանի։ Երկիրը գտնվում է աշխարհաքաղաքական շղթայի կենտրոնում. հարավում Իրանն է, որը հակադրվում է ԱՄՆ-ին և Իսրայելին։ Արևելքում Ադրբեջանն է, արևմուտքում՝ Թուրքիան, որն աջակցում է Բաքվին։ Հյուսիսում Վրաստանն է, որի եվրոպական ուղին փաստացի սառեցված է քաղաքական ճգնաժամի պատճառով։ Հետևաբար, Ռուսաստանի սպառնալիքներին հակառակ, հայերն ընտրություններում կլուծեն շատ ավելի հրատապ հարցեր, քան «Պուտինին ամուսնալուծության համար դիմելն է»։
