Փաշինյանն իր հռետորաբանությամբ վատնեց ԵՄ-ի «նվիրաբերած» քաղաքական կապիտալը․ «Независимая газета»
Հայաստանը հաղթահարեց պաշտոնական ընտրարշավի առաջին շաբաթը։ Տեղի բնակիչների խոսքով՝ եթե վարչապետ և «Քաղաքացիական պայմանագրի» առաջնորդ Նիկոլ Փաշինյանը չլիներ, նրանք կարող էին նույնիսկ չնկատել փոփոխությունները։ Սակայն դա գովեստ չէ․ գրում է «Независимая газета»-ն։
Ինչպես նշվում է, Նիկոլ Փաշինյանն ուշադրություն է հրավիրում իր և իր կուսակցության վրա ցանկացած միջոցով՝ հաճախ սխալ ընտրելով իր խոսքերը։
«Այս հողը (Լեռնային Ղարաբաղը) մե՞րն էր։ Մենք այնտեղ դպրոց կառուցե՞լ ենք։ Մանկապարտե՞զ։ Գործարա՞ն։ Բնակավա՞յր… Ինչպե՞ս էր այն մերը։ Սո՛ւտ է, երբ ասում են՝ «Ղարաբաղը մերն էր, բայց հիմա՝ ոչ»։ Իրականությունն այն է, որ Հայաստանը նախկինում մերը չէր, բայց հիմա մերն է», – հայտարարել է Փաշինյանն ընտրողների հետ հանդիպման ժամանակ։
Յուրաքանչյուրի համար, ով երբևէ կապ է ունեցել Լեռնային Ղարաբաղի հետ, ակնհայտ է, որ վարչապետն առնվազն վատ է ձևակերպել իր մտքերը, և, հնարավոր է, նույնիսկ բացահայտ ստել է։ Սակայն 2020 թվականին նույն մարդը հայտարարում էր. «Արցախը Հայաստան է և վե՛րջ»․ գրում է թերթը։
Հետագայում Բաքուն օգտագործեց այս արտահայտությունը Երկրորդ ղարաբաղյան պատերազմի սկիզբն արդարացնելու համար։ Իրականում նույնիսկ Ադրբեջանի իշխանությունները գիտակցում են, թե որքան շատ բան են կառուցել հայերը տարածաշրջանում վերջին 30 տարիների ընթացքում, քանի որ նրանք արշավ են վարում այս ժառանգությունը ոչնչացնելու համար: Արդյունքում՝ Փաշինյանն այնպիսի թշնամանքի ալիք առաջացրեց, որ որոշ դիտորդներ, որոնք սովորաբար հավատարիմ կամ չեզոք են նրա նկատմամբ, նշեցին «Քաղաքացիական պայմանագրի» կողմից Երևանում անցկացված եվրոպական գագաթնաժողովների 3 օրերի ընթացքում վաստակած ամբողջ քաղաքական կապիտալի վատնումը։ Սակայն վարչապետը դրանով չսահմանափակվեց:
Ընտրողների հետ մեկ այլ հանդիպման ժամանակ նա հայտարարեց, որ Երևանը պետք է որոշի, թե «ինչ անել ադրբեջանական էքսկլավների հետ»: Միևնույն ժամանակ, «Քաղաքացիական պայմանագիր» կուսակցությունն աշխատում է լրատվամիջոցներում փոթորիկ առաջացնել՝ խեղդելով մյուս կուսակցությունների նախընտրական քարոզարշավները:
Փաշինյանը սոցիալական ցանցերի միջոցով անընդհատ սրտառուչ հաղորդագրություններ է ուղարկում իր հայրենակիցներին, մինչդեռ լրատվամիջոցները քննարկում են վարչապետի հարաբերությունները նախկին կնոջ հետ, նրա պարերը և այլն:
