Քաղհասարակության տարածքը համաշխարհային մասշտաբով կրճատվում է․ աշխարհի բնակչության միայն 3.4 տոկոսն է ապրում իսկապես բաց հասարակություններում
Brot für die Welt կազմակերպությունը եզրակացրել է, որ աշխարհի բնակչության 3.4 տոկոսն է ապրում իսկապես բաց հասարակություններում, մինչդեռ 30%-ը՝ լիովին փակ հասարակություններում: Ավտորիտարներն ու պոպուլիստներն ակտիվորեն շահագործում են ապատեղեկատվությունը. գրում է dw.com-ը։
«Աշխարհի մարդկանց մեծամասնությունը չի կարող ձեռք բարձրացնել և ազատորեն խոսել»,- նշել է Brot für die Welt կազմակերպության նախագահ Դագմար Պրուինը քաղաքացիական հասարակության և ժողովրդավարության վիճակի մասին տարեկան զեկույցի ներկայացման ժամանակ:
«Քաղաքացիական հասարակության ատլաս» զեկույցն ամեն տարի հրապարակվում է Brot für die Welt բարեգործական կազմակերպության կողմից, որը Գերմանիայի բողոքական եկեղեցիների աջակցությունը վայելող բարեգործական կազմակերպություն է և համագործակցում է գործընկեր կազմակերպությունների հետ՝ համաշխարհային սովի դեմ պայքարելու և Հարավում կայուն զարգացումը խթանելու համար: Այս տարվա զեկույցում հատուկ շեշտադրում է արվում ապատեղեկատվության լայն տարածման վրա:
Գերմանիան այժմ դասակարգվում է որպես «սահմանափակ» բացություն ունեցող երկիր:
«Այս տարի «սահմանափակ» բացություն ունեցող հասարակությունների թիվն աճել է 7%-ով»,- բացատրում է Brot für die Welt-ի մարդու իրավունքների փորձագետ Սիլկե Փֆայֆերը։
Սա ներառում է Հյուսիսի բազմաթիվ երկրներ, որոնք պնդում են, որ ժողովրդավարական են, ինչպիսին են Միացյալ Նահանգները, Ֆրանսիան, Իտալիան և Գերմանիան։
Իրավիճակը տարբեր է հետխորհրդային տարածքում։ Օրինակ՝ Ռուսաստանը, Բելառուսը, Ուզբեկստանը, Տաջիկստանը, Թուրքմենստանը և Ադրբեջանը դասակարգվում են որպես փակ հասարակություններ։ Ղազախստանը, Ղրղզստանը և Վրաստանը դասակարգվում են որպես ճնշված բացություն ունեցող հասարակություններ։ Ատլասի հեղինակների կարծիքով՝ Ուկրաինան, ինչպես Գերմանիան, դասակարգվում է որպես սահմանափակ բացություն ունեցող հասարակություն։
Մոլդովան և Հայաստանը տարածաշրջանի լավագույն ցուցանիշներ ունեցող երկրներն են։
Փաստաթղթում նշվում է, որ հակաֆեմինիզմը և ԼԳԲՏ+ համայնքի նկատմամբ թշնամանքն ավտորիտար օրակարգի հիմնական բաղադրիչներն են ամենուրեք։
Այս տարվա զեկույցը հատկապես կենտրոնանում է ապատեղեկատվության համաշխարհային աճի վրա, մասնավորապես՝ դրա տարածման վրա արհեստական բանականության դարաշրջանում:
Brot für die Welt-ը նշում է, որ մարդկանց 75 տոկոսն անհանգստանում է արհեստական բանականությունից կեղծ տեղեկատվություն ստանալու համար, բայց նրանց միայն մոտ մեկ երրորդն է իրականում փորձում ստուգել դրա իսկությունը։
