Թրամփը բունկերանման պարահանդեսային դահլիճի նոր մանրամասներ է բացահայտել

ԱՄՆ նախագահ Դոնալդ Թրամփը բացահայտել է Սպիտակ տանը կառուցվող նոր, բունկերանման պարահանդեսային դահլիճի մասին նախկինում չբացահայտված մանրամասները․ գրում է Reuters գործակալությունը։

Դահլիճի տանիքին կկառուցվի անօդաչու սարքերի բազա․ համալիրը կունենա նաև խոհանոց և գրասենյակներ՝ առաջին տիկնոջ և նրա անձնակազմի համար։

Թրամփի խոսքով՝ 90․000 քառակուսի ոտնաչափ մակերեսով համալիրը չափերով կգերազանցի 18-րդ դարի վերջին կառուցված Սպիտակ տան կառույցին։

Դահլիճի տակ կլինի վեց հարկ խորությամբ ստորգետնյա համալիր, որը կներառի ռազմական հիվանդանոց և հետազոտական ​​կենտրոններ։ Թրամփը, սակայն, չի նշել՝ ինչ հետազոտություններ են այնտեղ իրականացվելու։

Նա ոգևորությամբ է խոսել տանիքին անօդաչու սարքերի բազայի կառուցման մասին, որը նախատեսված է «անսահմանափակ թվով անօդաչու սարքերի համար»։

«Ամբողջ տանիքը կառուցված է զինվորականների համար։ Այն ոչ միայն պաշտպանված է անօդաչու սարքերից, ինչը նշանակում է, որ եթե անօդաչու սարք հարվածի այդ ուղղությամբ, այն հետ կթռչի՝ չունենալով ոչ մի ազդեցություն, այլ նաև նախատեսված է որպես անօդաչու սարքերի նավահանգիստ, որը կպաշտպանի ամբողջ Վաշինգտոնը»,- ասել է Թրամփը։

Նշվում է, որ շինարարական աղմուկի մեջ Թրամփը լրագրողների հետ շրջայց է կատարել նախագծի տարածքում՝ փորձելով հիմնավորել իր այն փաստարկը, թե Կոնգրեսը պետք է 1 միլիարդ դոլար հատկացնի շենքի անվտանգության բարելավման համար։

Դեմոկրատները և որոշ հանրապետականներ դեմ են արտահայտվել նրա այս նախագծին՝ այն անվանելով շռայլ, այն դեպքում, երբ ամերիկացիները պայքարում են բենզինի գների աճի և Իրանի դեմ պատերազմի այլ հետևանքների դեմ։