Հունիսին սպասում ենք Հայաստանի ու Ադրբեջանի միջև խաղաղության շուրջ արդյունավետ քննարկումների․ Թրամփ
ԱՄՆ նախագահ Դոնալդ Թրամփը հայտարարել է, որ իր վարչակազմը հունիսին սպասում է Հայաստանի և Ադրբեջանի միջև խաղաղության շուրջ արդյունավետ քննարկումների․ նշվում է Թրամփի՝ Բաքվի 31-րդ էներգետիկ շաբաթվա մասնակիցներին ուղղված ուղերձում։
ԱՄՆ նախագահն ընդգծել է, որ տարածաշրջանային էներգետիկ ինտեգրացիան 2025 թվականի օգոստոսի 8-ին Վաշինգտոնում կայացած խաղաղության գագաթնաժողովի հիմնական հենասյուներից մեկն է։
«Երբ մենք հանդիպեցինք Սպիտակ տանը, քայլ առաջ արեցինք և հասանք Հայաստանի և Ադրբեջանի միջև երկարատև խաղաղության։ Ինչպես գիտեք, տարածաշրջանային էներգետիկ ինտեգրացիան օգոստոսի 8-ին կայացած պատմական խաղաղության գագաթնաժողովի հիմնական հենասյուներից է։ Իմ վարչակազմը սպասում է հունիսին այս թեմայի շուրջ արդյունավետ քննարկումների»,- նշել է Թրամփը։
Նրա խոսքով՝ Միացյալ Նահանգներն ու Ադրբեջանն ածխաջրածնային ոլորտում համագործակցության երկար պատմություն ունեն և հանձնառու են մատչելի և հուսալի էներգիա մատակարարելուն։ Եզրափակելով՝ Թրամփը նշել է, որ համատեղ ջանքերը կնպաստեն խաղաղությանը, կընդլայնեն բարգավաճումը և կձևավորեն ավելի անվտանգ ապագա ինչպես տարածաշրջանի, այնպես էլ աշխարհի համար։
