ԱՄՆ-ն ավագ գործընկերն է, Իսրայելը՝ կրտսեր․ Նեթանյահուի հարցազրույցը՝ կետերով
Յուրաքանչյուր ոք կարող է օգտվել Google քարտեզներից՝ պարզելու համար՝ իրականում ինչ է տեղի ունենում Գազայում․ ABC News-ին տված հարցազրույցում հայտարարել է Իսրայելի վարչապետ Բենիամին Նեթանյահուն՝ պատասխանելով լրագրողի հարցին՝ ինչու օտարերկրյա լրագրողներին թույլ չի տրվում մուտք գործել Գազա։
Նեթանյահուի հարցազրույցը ներկայացնում ենք կետերով․
- Թրամփն, ըստ էության, ունի 3 տարբերակ. առաջինը՝ իսկապես հաջողել համաձայնություն ձեռք բերել Իրանի հետ, երկրորդը՝ շարունակել շրջափակումը, երրորդը՝ դիմել ռազմական գործողությունների։ Մեզ համար ընդունելի է ցանկացած տարբերակ, որը կհանգեցնի Իրանի միջուկային ծրագրի ավարտին։ Դա մեր ընդհանուր նպատակն է։
- Սպիտակ տանը Թրամփի հետ հանդիպման ժամանակ չեմ փորձել համոզել նրան վերսկսել Իրանի դեմ հարվածները։ Մենք քննարկել ենք 3 հնարավոր տարբերակ, և կարծում եմ՝ դա արել ենք բաց ու անկեղծ ձևով՝ որպես ընկերներ և դաշնակիցներ։ Իսկ վերջնական որոշումը պետք է կայացնի Թրամփը։
- Հարցին՝ արդյոք Իսրայելի նպատակը դեռևս Իրանում իշխանափոխությո՞ւնն է, Նեթանյահուն ասել է․ «Իմ նպատակն է համոզվել, որ Իրանն այս ռեժիմի պայմաններում միջուկային զենք չի ունենա»։
- Ամերիկայում հաճախ ասում են, որ Թրամփն անում է այն ամենը, ինչ ես եմ ասում, իսկ Իսրայելում հաճախ ասում են, որ ես անում եմ այն ամենը, ինչ նա է ասում։ Բայց իրականությունն այն է, որ մենք գործընկերներ ենք․ մենք դաշնակիցներ ենք։ Նա ավագ գործընկերն է։ Ի վերջո, դա Ամերիկայի Միացյալ Նահանգներն է։ Չպետք է մոռանալ դա։ Իսկ ես կրտսեր գործընկերն եմ, բայց միևնույն ժամանակ ես Իսրայելի վարչապետն եմ։ Եվ երբ պետք է պաշտպանեմ իմ երկրի շահերը և իմ երկրի անվտանգությունը, ես դա անում եմ։
- Հարցին՝ ինչո՞ւ Իսրայելը թույլ չի տալիս օտարերկրյա լրագրողներին առանց իսրայելական ուժերի ուղեկցության մուտք գործել Գազայի հատված՝ այնտեղ տեղի ունեցող իրադարձությունները լուսաբանելու համար, Նեթանյահուն ասել է․ «Յուրաքանչյուր ոք կարող է օգտվել Google քարտեզներից՝ պարզելու համար՝ իրականում ինչ է տեղի ունենում»։
- Մենք ժամանակակից ժողովրդավարություն ենք, որը պայքարում է բարբարոսների դեմ։ Իսկ Նյու Յորքի քաղաքապետն աջակցում է բարբարոսներին։
