Ուկրաինան Մոսկվայի և Լենինգրադի մարզերում ԱԹՍ-ներով հարվածել է Wildberries-ի պահեստներին

Ուկրաինան անօդաչու սարքերով հարվածել է Ռուսաստանի Մոսկվայի և Լենինգրադի մարզերում գտնվող Wildberries-ի պահեստներին։

Լենինգրադի մարզի ղեկավար Ալեքսանդր Դրոզդենկոն այս մասին հայտարարել է իր Telegram ալիքում։

Նրա խոսքով՝ հրդեհ է բռնկվել այն բանից հետո, երբ անօդաչու սարքը հարվածել է Տոսնենսկի շրջանի Կրասնի Բոր գյուղի պահեստին։ Հարձակման թիրախում են եղել Wildberries և Russ համատեղ ընկերությունների պահեստները։

«Ստեղծվել է արտակարգ իրավիճակների արձագանքման խումբ։ Լենինգրադի մարզային հրշեջ-փրկարարական ծառայության և Լենինգրադի մարզի Արտակարգ իրավիճակների նախարարության գլխավոր վարչության անհրաժեշտ ռեսուրսները գործի են դրվել հրդեհը մարելու համար», – նշել է Դրոզդենկոն։

Ուկրաինական լրատվամիջոցները նաև հայտնել են, որ օգոստոսի 4-ի գիշերն անօդաչու սարքերը հարվածել են նաև Մոսկվայի մերձակայքում գտնվող Չեխովի պահեստներին, որտեղ հարձակումից հետո հրդեհ է բռնկվել։

Կրասնի Բոր համալիրում գտնվում է Wildberries լոգիստիկ համալիրը, որը զբաղեցնում է մոտ 154,000 քառակուսի մետր տարածք։