FIFA-ն սարսափելի սխալ կգործի, եթե փոխարինի իր ղեկավարին․ Թրամփն աջակցություն է հայտնել Ինֆանտինոյին

ԱՄՆ նախագահ Դոնալդ Թրամփը հայտարարել է, որ Ֆուտբոլի միջազգային ֆեդերացիան (ՖԻՖԱ) «սարսափելի սխալ» կգործի, եթե որևէ պատճառով նույնիսկ մտածի իր նախագահ Ջաննի Ինֆանտինոյին փոխարինելու մասին: Նա այս մասին գրել է Truth Social սոցիալական հարթակում:

Ըստ Թրամփի՝ ՖԻՖԱ-ի ներկայիս առաջնորդը կազմակերպել է պատմության մեջ «ամենահաջողակ Աշխարհի առաջնությունը», և եթե նա հեռանա, մրցաշարը երբեք այդքան շահութաբեր չի լինի:

Հուլիսի վերջին հայտարարվել էր, որ Ինֆանտինոն որոշել է Աշխարհի առաջնությունների իրավունքների մի մասը վաճառել մասնավոր ներդրողներին: Ակնկալվում էր, որ իրավունքների մոտ 20%-ը կանցնի մասնավոր ներդրողների խմբին, որը գլխավորում է Ջոշուա Քուշները՝ Դոնալդ Թրամփի փեսայի՝ Ջարեդ Քուշների եղբայրը:

Այս գաղափարը սուր քննադատության է արժանացել ազգային ֆուտբոլային ֆեդերացիաների կողմից, որոնք սպառնացել են բոյկոտել Աշխարհի առաջնությունները, եթե վաճառքը տեղի ունենա: Դրանից հետո ՖԻՖԱ-ն հայտարարել է, որ հրաժարվել է այդ ծրագրից, և Ինֆանտինոն ինքը ներողություն է խնդրել:

Շուտով Ինֆանտինոյի հետ կապված մեկ այլ սկանդալ է բռնկվել: The Telegraph-ը հայտնել է, որ նրա ենթադրյալ սիրուհին վեցանիշ փոխհատուցում է ստացել ՈՒԵՖԱ-ից, երբ նա կազմակերպության գլխավոր քարտուղարն էր։