Մեծ Բրիտանիայում կայացել է «մսային սոուսի մեջ ըմբշամարտի» աշխարհի առաջնություն
Մեծ Բրիտանիայի Լանկաշիր կոմսությունում տեղի է ունեցել «մսային սոուսի մեջ ըմբշամարտի» անսովոր աշխարհի առաջնություն: Մասնակիցները «լուծել են իրենց տարաձայնությունները» մոտավորապես 1500 լիտր խիտ սոուսով ողողված ռինգում․ հայտնում է Daily Mail-ը:
Մրցումը տեղի է ունենում Bacup Cricket Club-ում: Խաղերից առաջ դաշտն առատորեն լցվում է սոուսով, որից հետո սայթաքուն ռինգ են մտնում վառ գույների զգեստներով ըմբիշները:
Յուրաքանչյուր մենամարտ տևում է երկու րոպե: Հաղթողները որոշվում են ոչ միայն իրենց ըմբշամարտի կարողություններով, այլև իրենց ելույթի դիտարժանությամբ և հանդիսատեսի արձագանքով:
Մրցաշարն առաջին անգամ կազմակերպվել է 2007 թվականին: Այդ ժամանակվանից ի վեր այս թվացյալ տարօրինակ զբաղմունքը դարձել է ամենամյա միջոցառում՝ գրավելով այս անսովոր չեմպիոնական տիտղոսի համար մրցել ցանկացողներին: Մրցաշարի հիմնական առանձնահատկությունը մնում է «ռինգը». հարյուրավոր լիտր մսային սոուսի մեջ ոտքի վրա մնալը հաճախ մասնակիցների համար ավելի հեշտ չէ, քան մրցակցին հաղթելը:
