ԱՄՆ զինուժը պատրաստվում է Կուբայի դեմ հնարավոր ռազմական գործողությունների․ CBS

ԱՄՆ ցամաքային զորքերի պահեստազորն առաջիկա ամիսներին, հնարավոր է, իր կազմից որոշակի օժանդակ ստորաբաժանումներ տրամադրի Հարավային հրամանատարությանը։ CBS հեռուստաալիքը, վկայակոչելով ԱՄՆ զինված ուժերի սեփական աղբյուրներին, հայտնում է, որ դա կապված է Կուբայի դեմ հնարավոր ռազմական գործողության պլանավորման հետ․ գրում է РИА Новости-ն։

Հեռուստաալիքի տվյալներով՝ ԱՄՆ ցամաքային զորքերի պահեստազորի շտաբը ենթակա միավորումներից տեղեկություններ է խնդրել վեց ստորաբաժանումների վերաբերյալ, որ կարող են կցվել ԱՄՆ Հարավային հրամանատարությանը։

Փաստաթղթում նշվում է, որ այդ ստորաբաժանումները «հավանաբար անհրաժեշտ կլինեն 90-120 օրից»։ Խոսքը մարտական ապահովման գումարտակի, ինժեներական գումարտակի, բժշկական բրիգադի, վերակենդանացման և վիրաբուժության ստորաբաժանման, ռազմական ոստիկանության բրիգադի և թիկունքային ապահովման հրամանատարության ստորաբաժանման մասին է։

CBS-ի մի քանի աղբյուրներ հայտնել են, որ թեև համապատասխան փաստաթղթերում Կուբայի անունն ուղղակիորեն չի նշվում, բայց երկարաժամկետ ռազմական պլանավորման վերաբերյալ հարցումն ուղղված է Կուբայի դեմ գործողության նախապատրաստմանը։

Միաժամանակ, ամերիկացի զինվորականներն էլ ասել են, որ այս տարի ԱՄՆ զինված ուժերը հետախուզական գործողություններ են իրականացրել՝ ուսումնասիրելով Կուբայի շրջակայքի ստորջրյա (և ոչ միայն) ուղիները։