Թուրքիայում պացիենտի աջ ականջը վիրահատելու փոխարեն ձախն են վիրահատել, հետո «շտկել» սխալը
Թուրքիայի Գեբզե քաղաքի բնակիչ Մուրադ Թարաքչըն պնդում է, որ Թուզլա շրջանի մասնավոր համալսարանական հիվանդանոցում իր աջ ականջի փոխարեն ձախ ականջի մեջ են լսափողակ տեղադրել։
Նույն օրը նա վիրահատվել է երկրորդ անգամ․ գրում է ria.ru-ն։
«Չնայած այն հանգամանքին, որ հետազոտության արդյունքները հստակ ցույց էին տալիս աջ ականջի վիրահատության անհրաժեշտությունը, նրանք վիրահատել են ձախ ականջը։ Վիրահատությունից հետո ես ուժեղ ցավ զգացի ձախ ականջումս, և հարցրի անձնակազմին, թե ո՞ր ականջն են վիրահատել։ Նրանք պատասխանեցին՝ ձախը», – նշել է Թարաքչըն։
Նրա խոսքով՝ սխալը հայտնաբերելուց հետո վիրաբուժական խումբը կրկին հավաքվել է, և հիվանդը նույն օրն ընդհանուր անզգայացմամբ կրկին վիրահատվել է։
Թարաքչըն նշել է, որ մեկ օրում երկու վիրահատության ենթարկվելը տրավմատիկ փորձառություն է եղել։
Վիրահատություններից հետո պացիենտը, իր խոսքով, բախվել է ականջներում մշտական աղմուկի, լսողության վատացման և հավասարակշռության խախտման խնդրին։
Թարաքչըի փաստաբան Հաքան Յըլդըզը հայտարարել է, որ ինքը դատական գործընթաց է սկսել։
