Մտահոգիչ են ոչ միայն ընտրությունների վերաբերյալ ԵԽԽՎ զեկույցում ներկայացված փաստերը, այլև իշխանության որդեգրած մոտեցումները․ պատգամավոր

Մտահոգիչ են ոչ միայն Հայաստանում խորհրդարանական ընտրությունների վերաբերյալ ԵԽԽՎ զեկույցում ներկայացված փաստերը, այլև իշխանության որդեգրած մոտեցումները, հատկապես այն դեպքում, երբ խոսքը վերաբերում է քաղաքական ուժերի ներկայացուցիչների մասնակցությանն ընտրական գործընթացներին. այս մասին այսօր «Ուժեղ Հայաստան» կուսակցության հրավիրած ասուլիսի ընթացքում հայտարարեց «Ուժեղ Հայաստան» խմբակցության պատգամավոր Հարություն Հարությունյանը:

«Այստեղ խնդիրը ոչ միայն զեկույցն է, այլև իշխանության որդեգրած մոտեցումները, հատկապես քաղաքական գործիչների մասնակցությամբ, այն անձանց, որոնք քաղաքական ուժերի կազմում են և մասնակցում են ընտրական պայքարին։ Դրանք մտահոգիչ են», -ասաց Հարությունյանը։

Նրա խոսքով՝ մտահոգության առարկա պետք է լինի նաև իշխանության քաղաքական գործելակերպը, որը, իր գնահատմամբ, նահանջ է եվրոպական արժեքներից և չափանիշներից։

«Մտահոգություն պետք է ունենանք ոչ թե զեկույցի առնչությամբ, այլ այն բանի, որ իշխանությունը, իր քաղաքական գործելակերպով, նահանջել է եվրոպական արժեքներից, եվրոպական ստանդարտներից, նույն անկախ դատական համակարգի ձևավորման հանձնառությունից, քաղաքական բանտարկյալների և մարդու իրավունքների պաշտպանության սկզբունքներից»,- նշեց պատգամավորը։

Հարությունյանը նշեց, որ «Ուժեղ Հայաստան»-ը հանձնառություն ունի շարունակելու եվրոպական ինտեգրման գործընթացին, եվրոպական չափանիշների և գործիքակազմի ներդրմանն ու անկախ դատական համակարգի ձևավորմանն ուղղված աշխատանքը։

«Ինչպես գիտեք, Եվրոպական ինտեգրման հանձնաժողովը ևս «Ուժեղ Հայաստան»-ի ներկայացուցիչ է նախագահում՝ հանձինս ինձ։ Հետևաբար՝ մենք նաև հանձնառություն ունենք եվրոպական ինտեգրման գործընթացի շարունակականությունն ապահովելու, եվրոպական ստանդարտների և գործիքակազմի ներդրման, անկախ դատական համակարգի ձևավորման ուղղությամբ»,-ասաց նա։

Միաժամանակ Հարությունյանը նշեց, որ անհրաժեշտ է ապահովել նաև համապատասխան ֆինանսավորման շարունակականությունը։

«Հետևաբար՝ այդ մտահոգությունը, այո՛, մենք էլ ունենք, բայց ամեն ինչ պետք է անենք, որ այդ մասով ֆինանսավորումից չզրկվենք», -ասաց ԱԺ պատգամավորը։