2027-ից պոլիէթիլենային տոպրակներն ու մեկանգամյա օգտագործման պլաստիկ ապրանքները կարգելվեն․ կլինի բացառություն

2027 թվականի հունվարի 1-ից առևտրի օբյեկտներում, հանրային սննդի օբյեկտներում, առևտրի իրականացման վայրերում, շրջիկ առևտրի կետերում, տոնավաճառներում (վերնիսաժներում), ցուցահանդես-վաճառքներում, շրջածախ առևտրի միջոցով, ինչպես նաև բացօթյա առևտրի դեպքում մանրածախ առևտուր իրականացնելիս արգելվում է պոլիէթիլենային տոպրակների և մեկանգամյա օգտագործման պլաստիկ ապրանքների օտարումը և առկայությունը․ հայտնում են Շրջակա միջավայրի նախարարությունից։

«Բացառություն են կշռափաթեթավորման համար օգտագործվող պարկերը (առանց բռնակների տոպրակները):

Կշռափաթեթավորում՝ ապրանքի սանիտարահիգիենիկ նորմերի, որակական հատկությունների ապահովման նպատակով, ինչպես նաև կշռող սարքի օգտագործմամբ իրականացվող փաթեթավորում.

Եթե ապրանքն ունի գործարանային փաթեթավորում, ապա կշռափաթեթավորման համար բացառություն նախատեսված չէ»,- ասված է հաղորդագրությունում։

Հիշեցնենք, որ պոլիէթիլենի կիրառումը սահմանափակող օրենք Փաշինյանի իշխանությունն ընդունել էր նաև 4 տարի առաջ, բայց այն, փաստացի, չգործեց։