«Նա չգիտեր, որ այդ աղջիկը լրտես է, և ես հավատում եմ նրան»․ Թրամփը՝ Nvidia-ի ղեկավարի և լրտեսության համար կասկածվող չինուհու սիրավեպի մասին

 ԱՄՆ նախագահ Դոնալդ Թրամփը մեկնաբանել է Nvidia ընկերության գլխավոր տնօրեն Ջենսեն Հուանգի շուրջ ծագած սկանդալը, որը խոստովանել է, որ դավաճանել է կնոջը և սիրավեպ է ունեցել լրտեսության համար կասկածվող չինուհու հետ։

«Այսօր ես խոսել եմ Ջենսենի հետ։ Նա ինձ ասաց, որ երբեք չի իմացել, որ այդ կինը լրտես է, և ես իսկապես հավատում եմ նրան»,- լրագրողների հարցերին պատասխանելիս հայտարարել է Թրամփը։

Նա հավելել է, որ Հուանգին համարում է «շատ բարձր բարոյական հատկանիշներով մարդ», որն «ապշեցուցիչ աշխատանք է կատարել» երկրի համար։

«Գիտեք, նա ունի մի չիպ, որը տեխնոլոգիապես առաջ է անցել 10 տարով։ Դիզայնի բարդության պատճառով այն նույնիսկ հնարավոր չէ պատճենել։ Ես պարզապես հույս ունեմ, որ խնդիրներ չեն առաջանա։ Ես կարդացի նրա հայտարարությունը և հավատում եմ, որ նա հիմա շատ է տառապում՝ հատկապես իր ընտանիքի, իր կնոջ համար, ում նա սիրում է»,- ասել է Թրամփը։

Ի պատասխան այն հարցին, թե արդյոք Nvidia-ի ղեկավարն իր հետ կմեկնի՞ Ասիա կատարելիք ուղևորությանը, ԱՄՆ նախագահն ասել է, որ «անխոս իր հետ կվերցներ նրան»։

«Ես չեմ լսել, որ նա որևէ վատ բան արած լինի։ Նա գործ է ունեցել ինչ-որ մեկի հետ, բայց չէ՞ որ մնացած բոլորն էլ ինչ-որ մեկի հետ գործ են ունենում»,— հավելել է Թրամփը։

Nvidia-ի ղեկավար Ջենսեն Հուանգի և Չինաստանի քաղաքացուհու միջև հարաբերությունների մասին, որն աշխատել է Nvidia-ից չիպեր գնող ընկերությունում, գրել է The New York Times-ը։ Ավելի ուշ Հուանգը նամակով դիմել է աշխատակիցներին՝ խոստովանելով այդ կապը և ներողություն խնդրելով իր կնոջից ու գործընկերներից։