Հերոսների անունը կրող դասասենյակներում արժեքներ պետք է ստեղծվեն, որոնք սերունդներին կսովորեցնեն երկիրը տանել ոչ թե կործանման, այլ վերելքի ճանապարհով. Genesis Armenia ուղեղային կենտրոն/հիմնադրամը Երևանի Աշոտ Նավասարդյանի անվան 196 հիմնական դպրոցում բացեց ինտերակտիվ դասարան։
Դասասենյակը 44-օրյա պատերազմում զոհված Աշոտ Մաթևոսյանի անունն է կրելու։ Նրա երեք երեխաները սովորում են հենց այդ դպրոցում։
«Պետք է աշխատել բոլոր ճակատներում, բայց սկսել՝ դպրոցից. ունենալ կրթված, դաստիարակված, արժեքներ ունեցող դպրոց և աշակերտներ»,-նշեց Genesis Armenia-ի հիմնադիր տնօրեն Աբրահամ Գասպարյանը։
Գասպարյանի խոսքով՝ երկրում ստեղծված այս վճռորոշ փուլում պատահական չէր այս դասասենյակի բացումը և այն էլ Աշոտի տարեդարձի օրը. հերոսը ծնունդով Տավուշից է, որի ճակատագիրն է որոշվում այսօր:
Բացման արարողությանը ներկա էին նաև Աշոտ Մաթևոսյանի ծնողները, երեխաները, կինը, որոնք տարբեր պատմություններ էին հիշում ու պատմում հերոս տղայի մասին:
Դասարանը համալրված է 12 համակարգչով, 12 նոթբուքով, սմարթ գրատախտակով և տպիչ սարքով: «Ինտերակտիվ դասարանի շնորհիվ աշակերտներն արդեն ունեն հնարավորություն՝ դասապրոցեսն անցկացնել ավելի հետաքրքիր, արդյունավետ ու մատչելի»,- ասաց դպրոցի տնօրեն Անուշ Նավասարդյանը:
Դասասենյակը նախատեսված է բոլոր դասարանների համար։
Նախաձեռնությունը կյանքի է կոչվել Genesis Armenia-ի և Oնտարիոյի հայկական միացյալ մարմնի անդամ Խորեն Մարդոյանի հաջակցությամբ։
Genesis Armenia-ն անկուսակցական նախաձեռնություն է՝ ուղեղային կենտրոն/հիմնադրամ, որի նպատակը համահայկական մտավոր ներուժի համախմբումն է, խելամիտ, առարկայական ու երկարաժամկետ ռազմավարական ծրագրերի միջոցով այդ ներուժը ֆինանսատնտեսական ներդրումների վերածելն ու ծառայեցնելը՝ ի սպաս հայ ժողովրդի ազգային շահերի: Genesis Armenia-ն հայկական մտավոր ներուժը համախմբում է՝ միջազգային հարաբերությունների, անվտանգային քաղաքականության, տնտեսության և բիզնեսի, արդյունաբերության և տեխնոլոգիաների, կրթամշակութային, առողջապահության ու բնապահպանության ոլորտներում` մեկտեղելով մեր հայրենակիցների հետազոտական ունակությունները, համաշխարհային կապերը, լոգիստիկ հնարավորությունները։
