Մառախուղի պատճառով մոլորվել է, սպանելու դիտավորություն չի ունեցել․ ՔԿ նախագահը՝ Շաքիում հայտնված ադրբեջանցու մասին
Շաքիի դեպքով ԱԺ-ում փակ հանդիպում է տեղի ունենալու․ Ազգային ժողովում լրագրողների հետ զրույցում ասաց Քննչական կոմիտեի նախագահ Արթուր Պողոսյանը։
«Ադրբեջանցին հարցաքննվել է, ցուցմունք է տվել, բայց բովանդակությունը բացահայտել չեմ կարող, կարող եմ նշել, որ ամբողջությամբ մատնանշել է վայրը, դեպքը, տեղանքը»,- ասաց նա։
«Ինքը մառախուղի պատճառով մոլորվել է: Միայն կարող եմ ասել, որ ադրբեջանցին սպանելու դիտավորություն չի ունեցել: Պետք է ախր փաստերը գնահատենք: Ասենք, անձը մոլորվելու արդյունքում քայլելով մոտենում է տանը, քարով կոտրում է ապակին և սոված է լինում, ճաշ է սարքում, փոխվում է, երեխաները մտնում են տուն, ինքը երեխաների ձեռքից հեռախոսը վերցնում է, նստեցնում է երեխաներին և ժամերով իրենց չի վնասում»,- հավելեց ՔԿ նախագահը:
Զինծառայողը, ըստ նրա, հիմա քրեակատարողական հիմնարկում է։
Հիշեցնենք՝ հոկտեմբերի 1-ին ադրբեջանցի զինծառայող Նասիմի Մուսաևն ապօրինի մուտք է գործել Սյունիքի մարզի Շաքի գյուղում Անի Ավետիսյանի տուն և կրակոցներ արձակել։ Կինը վիրավորվել է՝ փորձելով պաշտպանել երեխաներին։ Մուսաևը ձերբակալվել է, իսկ հոկտեմբերի 12-ին Անի Ավետիսյանն ու նրա երկու երեխաները ճանաչվել են տուժող։
