Տավուշցիներն ահազանգում են՝ կարկուտը վնասել է այգիներ, հողատարածքներ և բնակելի տների տանիքներ
Երեկ՝ հունիսի 20-ին, Տավուշի մարզում տեղացած ինտենսիվ կարկուտը զգալի վնասներ է հասցրել Նոյեմբերյան համայնքի Ոսկեպար, Բաղանիս, Ոսկեվան և Կոթի բնակավայրերին․ գրում է Tavushmedia-ն։
«Վնասվել են այգիներ, տնամերձ հողատարածքներ, ինչպես նաև բնակելի տների տանիքների թիթեղները։
Քաղաքացիներն ահազանգում են՝ կարկուտը վնասել է գյուղատնտեսական մշակաբույսերը, պտղատու այգիները և տնտեսությունները։ Վնասներ են արձանագրվել նաև տնամերձ հողամասերում։
Տեղական ինքնակառավարման մարմինները, ստեղծված իրավիճակի հետևանքները գնահատելու նպատակով, բնակավայրերի վարչական կենտրոններում իրականացնում են վնասների նախնական հաշվառման աշխատանքներ։
Բնակիչներն ակնկալում են տեղական ինքնակառավարման և պետական կառավարման մարմինների աջակցությունը՝ հասցված վնասների հետևանքները հաղթահարելու համար»,- նշում է լրատվամիջոցը։
