Ասադի կառավարությունը 2 տարի շարունակ զանգվածային գերեզմանից մարմինները տեղափոխել է մեկ այլ վայր՝ իր հանցագործությունները թաքցնելու համար. Reuters
Reuters-ի հետաքննությունը պարզել է, որ Սիրիայի նախկին նախագահ Բաշար ալ-Ասադի կառավարությունը 2019-2021 թվականներին գաղտնի գործողություն է իրականացրել՝ տասնյակ հազարավոր մարմիններ զանգվածային գերեզմանից տեղափոխելով այլ վայր՝ ռեժիմի հանցագործությունները թաքցնելու համար։
Խոսքը վերաբերում է զանգվածային գերեզմանին, որը գտնվում էր Դամասկոսից հյուսիս-արևելք Ալ-Քութայֆա քաղաքի մոտակայքում։ Այնտեղ 2012 թվականից ի վեր թաղված էին Սիրիայի քաղաքացիական պատերազմի ժամանակ բանտերում և ռազմական հոսպիտալներում մահացած զինվորներն ու բանտարկյալները։ Reuters-ն արբանյակային կադրերում հայտնաբերել է 15-ից 160 մետր երկարությամբ 16 խրամատ։
Հանրապետական գվարդիայի նախկին սպան Reuters-ին ասել է, որ մարմինները տեղափոխելու գաղափարը ծագել է 2018 թվականի վերջին։ Նրա խոսքով՝ Ասադը, որն այդ ժամանակ արդեն մի քանի տարի մեղադրվում էր դաժանության և զանգվածային բռնաճնշումների համար, հույս ուներ վերականգնել իր հեղինակությունն աշխարհում։
2019 թվականի փետրվարից մինչև 2021 թվականի ապրիլը, ըստ ականատեսների, 6-8 բեռնատար գրեթե ամեն շաբաթ Ալ-Քութայֆայի զանգվածային գերեզմանից տեղափոխել է աճյունները Դումեյր քաղաքի մոտ գտնվող անապատային նոր վայր, որը գտնվում է մի քանի տասնյակ կիլոմետր հեռավորության վրա: Այնտեղ, Reuters-ի արբանյակային պատկերները բացահայտել են առնվազն 34 խրամատ՝ 20-ից 125 մետր երկարությամբ: Ապացույցները և չափերը ենթադրում են, որ այնտեղ կարող են թաղված լինել տասնյակ հազարավոր մարդիկ:
Մարդու իրավունքների սիրիական կազմակերպությունները կարծում են, որ Ասադի ռեժիմի օրոք անհետացել է ավելի քան 160,000 մարդ, որոնք թաղված են եղել նրա կողմից ստեղծված տասնյակ զանգվածային գերեզմաններում: Reuters-ը Սիրիայի ժամանակավոր նախագահ Ահմեդ ալ-Շարաայի կառավարությանը տեղեկացրել է իր հետաքննության արդյունքների մասին: Կառավարությունը չի պատասխանել գործակալության հարցերին:
