Վրեժ՝ անարդարության համար․ Չինաստանում մահապատժի են ենթարկել Yoozoo Games-ի նախկին գործադիր տնօրենին՝ իր ղեկավարին թունավորելու համար

Չինաստանի իշխանությունները մահապատժի են ենթարկել մի տղամարդու, որը մեղադրվում էր իր ղեկավարի՝ միլիարդատեր խաղային մագնատ, Yoozoo Games ընկերության տնօրեն Լին Ցիի սպանության համար․ գրում է BBC-ն։

Տեղական կրատվամիջոցների հաղորդմամբ՝ 2020 թվականին Սյու Յաոն թունավորել էր Լինին, երբ վերջինս Netflix-ի հետ գործարք կնքելուն օժանդակելուց կարճ ժամանակ անց նրան դուրս էր թողել գործընթացներից։ Սյու Յաոն դատապարտվել է 2024 թվականին, իսկ մահապատիժն իրականացվել է այս տարվա մայիսի 21-ին։

Տեղեկությունը հաստատել է Yoozoo Games ընկերությունը՝ նշելով․ «Արդարությունը վերջապես հաղթեց»։

Լինի ղեկավարած Yoozoo Games ընկերությունը տնօրինում է չինական գիտաֆանտաստիկ եռագրության էկրանավորման իրավունքները, որի հիման վրա Netflix-ը ստեղծել է «3 Body Problem» սերիալը։ 2018 թվականին Լինը Սյու Յաոյին նշանակել էր ղեկավարելու Three-Body Universe դուստր ընկերությունը, որը զբաղվում էր գիտաֆանտաստիկ ֆրանշիզի նախագծերի կառավարմամբ։ 2020 թվականին, սակայն, նրանց հարաբերությունները վատացել են, երբ Լինը որոշել է բիզնեսի կառավարումը հանձնել այլ ղեկավարների։ Ըստ տեղական աղբյուրների՝ հարաբերությունների վատթարացումից հետո Սյու Յաոն Լինին տվել է թունավոր նյութեր՝ դրանք ներկայացնելով որպես պրոբիոտիկ հաբեր։ 2020 թվականի դեկտեմբերին Լինն իրեն վատ է զգացել և դիմել է հիվանդանոց։ Նա մահացել է 9 օր անց՝ 39 տարեկանում։