Արթուր Օսիպյանի կալանավորման հարցով քաղհասարակության ներկայացուցիչները դիմել են Եվրոպայի խորհրդի մարդու իրավունքների հանձնակատարին
Քաղաքացիական հասարակության մի խումբ ներկայացուցիչներ դիմել են Եվրոպայի խորհրդի մարդու իրավունքների հանձնակատարին, ինչպես նաև Հայաստանում գործող միջազգային կազմակերպություններին և դիվանագիտական առաքելություններին՝ հրավիրելով նրանց հրատապ ուշադրությունը Արթուր Օսիպյանի կալանավորման և նրա նկատմամբ շարունակվող քրեական հետապնդման վրա․ տեղեկացնում է «Թրանսփարենսի Ինթերնեշնլ Հայաստան» կազմակերպությունը։
Դիմումով մտահոգություն է հայտնվում, որ Արթուր Օսիպյանի նկատմամբ քրեական հետապնդումն ու ազատազրկումը կարող են լինել անհիմն, անօրինական և քաղաքական դրդապատճառներով պայմանավորված։
Առանձնահատուկ մտահոգություն է առաջացնում նաև նրա նկատմամբ երկամսյա նախնական կալանքի կիրառումը, տեսակցությունների և արտաքին աշխարհի հետ հաղորդակցության արգելքը, ինչպես նաև այն հանգամանքը, որ Օսիպյանը կալանքի տակ հացադուլ է իրականացնում։
Դիմումի հեղինակները ընդգծում են, որ ստեղծված իրավիճակը լուրջ վտանգ է ներկայացնում Հայաստանում ժողովրդավարական ազատությունների, քաղաքական բազմակարծության և խոսքի ազատության համար։
Քաղաքացիական հասարակության ներկայացուցիչները կոչ են անում անհապաղ ազատ արձակել Արթուր Օսիպյանին և լիարժեք երաշխավորել նրա հիմնարար իրավունքներն ու ազատությունները։
Ամբողջական հայտարարությունն՝ այստեղ։
