Տեմպը բավականին լավն է, կարևորը պահպանելն է և մեր նշած ժամկետներում ավարտելը․ Տիգրան Ավինյանը՝ Կիևյան կամրջի շինաշխատանքների մասին
Կիևյան կամրջի հիմնանորոգման աշխատանքները մեկնարկել են, ծրագրի շրջանակում նախատեսվում է իրականացնել կամրջի հիմնանորոգում, ներառյալ՝ երթևեկելի մասի և հետիոտնային հատվածների վերականգնում, դեֆորմացիոն կարերի ու ջրահեռացման համակարգի նորացում, ջրամեկուսացման աշխատանքներ, կամրջային թռիչքային կառուցվածքների և հենարանների վերականգնում, ինչպես նաև անվտանգության և կազմակերպչական միջոցառումների իրականացում․ այսօր Երևանի քաղաքապետարանի գործակարգավարական նիստում հայտարարեց Շինարարության և բարեկարգման վարչության պետի պաշտոնակատար Անդրանիկ Թևոսյանը։
«Տեմպը բավականին լավն է, ոնց հասկանում եմ, կարևորը պահպանելն է և մեր նշած ժամկետներում ավարտելը, որովհետև որքան էլ որ այս աշխատանքները կարևոր են և անվտանգությանն են միտված, առաջին հերթին՝ երևանցիների, այնուամենայնիվ, այս աշխատանքները բազմաթիվ խնդիրներ են ստեղծում քաղաքում խցանումների հետ կապված, և մեր վերահսկողությունը՝ ժամկետների և որակի հետ կապված, պետք է շատ ինտենսիվ լինի»,-ասաց Տիգրան Ավինյանը։
Անդրանիկ Թևոսյանը նաև տեղեկացրեց, որ Լամբադա կամրջի հիմնանորոգման աշխատանքների ձեռքբերման մրցույթը կայացել է։
Ինչ վերաբերում է Ավետ Ավետիսյան փողոցին, ապա այն պլանավորվում է բացել առավելագույնը 2 օրվա ընթացքում։
«Եռաշերտ ասֆալտապատում է տեղի ունենալու, առաջին և երկրորդ շերտերն արված են, աջ կողմում մայթի լայնացման աշխատանքներն ավարտված են, ստորգետնյա համակարգը կառուցված է, և այսօրվանից պլանավորում ենք 24 ժամում, եթե ամբողջությամբ մեր պլանավորածով գնա, արդեն ավարտենք»,-ասաց Անդրանիկ Թևոսյանը։
