Երևանում մի խումբ անձանց միջև ծեծկռտուք է տեղի ունեցել․ կա 5 վիրավոր․ Shamshyan.com
Հունիսի 30-ին ՀՀ ներքին գործերի նախարարության ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի պարեկները Երևանում կանխել են մի խումբ անձանց միջև վիճաբանությունն ու ծեծկռտուքը․ գրում է Shamshyan.com-ը։
Ինչպես դեպքի վայրից հայտնում է ֆոտոլրագրող Գագիկ Շամշյանը, ժամը 21։30-ի սահմաններում ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի պարեկներն Էրեբունի թանգարանի մոտ ծառայություն կատարելիս նկատում են, որ «Էրեբունի ամրոց» ռեստորանային համալիրի մոտ և դրան հարակից Այվազովսկի փողոցում մի խումբ անձանց միջև ծեծկռտուք է տեղի ունենում, մի քանի հոգի էլ ընկած են գետնին։
Վիճաբանության վայրում եղել է 5 վիրավոր, որոնց առաջին օգնություն են ցուցաբերել պարեկները, որից հետո նրանք տեղափոխվել են հիվանդանոց։
Տարածքում հայտնաբերվել է դանակ, պատառաքաղ, բջջային հեռախոսներ, որոնց վրա առկա են արնանման հետքեր, մահակ, որի վրա նույնպես առկա էին արնանման հետքեր, թմրանյութին նմանվող զանգված և կաթոցիչ։
Դեպքի փաստով Էրեբունի և Նուբարաշեն վարչական շրջանների քննչական բաժնում նախաձեռնվել է քրեական վարույթ, որտեղ էլ պարզվում են դեպքի հանգամանքները, մասնակիցների և վիրավորների ինքնությունը։
