Bloomberg-ը 178․000 դոլար կվճարի սինգապուրցի նախարարներից յուրաքանչյուրին՝ զրպարտությսն համար

Սինգապուրի երկու նախարարներ շահել են զրպարտության մասին դատական գործն ընդդեմ Bloomberg LP-ի: Հայցը երկրի անշարժ գույքի շուկայի մասին 2024 թվականի դեկտեմբերին հրապարակված լրատվական հոդվածի բովանդակությանն էր առնչվում։ Ազգային անվտանգության համակարգող նախարար Կ. Շանմուգամը և աշխատուժի նախարար Տան Սի Լենգը պնդել են, որ հոդվածը ենթադրում է, որ նրանք թաքցրել են երկու առանձին անշարժ գույքի գործարքների մանրամասները՝ փողերի լվացման հետաքննությունից խուսափելու համար։ Նրանք նաև նշել են, որ Bloomberg-ը դա արել է չարամիտ կերպով։

Bloomberg-ը հակադարձել է, որ «Սինգապուրի առանձնատների գործարքներն ավելի ու ավելի գաղտնի են» վերնագրով հոդվածը չի նշանակում այն, ինչ պնդում էին նախարարները, և որ դա արդար և հավասարակշռված պատմություն է։ Բարձրագույն դատարանի դատավոր Օդրի Լիմը համաձայնել է նախարարների հետ։ Լիմը երեքշաբթի հրապարակած իր դատավճռում նշել է, որ հոդվածը զրպարտչական է։ Նա նաև պարզել է, որ պատմությունը գրվել է չարամտությամբ և նախատեսված է երկու հայցվորների հեղինակությունը վարկաբեկելու համար։ «Մենք շատ հիասթափված ենք այս որոշումից, բայց, իհարկե, կհարգենք այն», – ասել է Bloomberg-ի գլխավոր խմբագիր Ջոն Միքլեթվեյթը։

«Մեր խմբագրությունը և մեր լրագրողը վարվել են ազնվորեն և պահպանել են մեր բոլոր խմբագրական չափանիշները ։ Մենք շարունակում ենք աջակցել նրանց», – ավելացրել է Միքլեթվեյթը։ Շանմուգամին և Թանին վճարվել է 230,000 սինգապուրյան դոլար (178,000 դոլար) որպես փոխհատուցում, իսկ Bloomberg-ին հանձնարարվել է հեռացնել հրապարակումը։ Bloomberg LP-ն Bloomberg News-ի մայր ընկերությունն է։