Լատվիայի ԱԳ նախարարը ստիպված է եղել թաքնվել ապաստարանում Կիևի վրա Ռուսաստանի հարձակման ժամանակ
Լատվիայի արտաքին գործերի նախարար Բայբա Բրաժեն որոշ ժամանակ անցկացրել է ապաստարանում՝ օգոստոսի 5-ի գիշերը Կիևի վրա Ռուսաստանի իրականացրած զանգվածային օդային հարվածի ժամանակ․ գրում է eurointegration.com.ua-ն։
Նա այս մասին խոսել է Ուկրաինայի արտաքին գործերի նախարար Անդրեյ Սիբիհայի հետ համատեղ մամուլի ասուլիսում։
Բրաժեն ցավակցություն է հայտնել հարվածի հետևանքով զոհերի ընտանիքներին։
«Մենք նաև թաքնվել ենք ռմբապաստարանում։ Սա առաջին անգամը չէր, և, ցավոք, վերջինը չի լինի»,- ասել է նա։
Բրաժեն ընդգծել է, որ չնայած այն հանգամանքին, որ «ռուսները կարող են կոտրել պատուհաններ և ոչնչացնել շենքեր», նրանք «երբեք չեն կարողանա ոչնչացնել Ուկրաինան կամ նրա ոգին»։
«Նրանք անկարող են կոտրել ուկրաինացիներին։ Եվ սա ամենակարևոր եզրակացությունն է, որ կարելի է անել այս այցից և այս բոլոր քննարկումներից», – ընդգծել է Լատվիայի արտաքին գործերի նախարարը։
Այս ֆոնին Սիբիհան ընդգծել է Ռուսաստանի վրա պատժամիջոցների միջոցով ճնշում գործադրելու անհրաժեշտությունը։
