«Թրամփի ուղին» տնտեսապես լիովին անարդյունավետ է․ ՌԴ ԱԽ քարտուղարի տեղակալ
Արևմտյան երկրները շարունակում են Եվրասիայում իրավիճակն ապակայունացնելու իրենց փորձերը։ ՀԱՊԿ-ը և ՇՀԿ-ն պետք է դառնան Եվրասիական տարածքում անբաժանելի անվտանգության ճարտարապետության ձևավորման հիմքը․ հայտարարել է Ռուսաստանի Անվտանգության խորհրդի քարտուղարի տեղակալ Ալեքսեյ Շևցովը։
Նրա խոսքով՝ արևմտյան երկրների նպատակները մնում են անփոփոխ՝ ռեսուրսների և լոգիստիկ հոսքերի նկատմամբ վերահսկողություն։
Նրա խոսքով՝ Հորմուզի նեղուցում ստեղծված իրավիճակից բացի, կա մեկ այլ օրինակ՝ «Թրամփի ուղին» Հայաստանում։
«Այն տնտեսապես լիովին անարդյունավետ է. նույնիսկ ամենաբարենպաստ կանխատեսման պայմաններում՝ դրա փոխհատուցելիությունը կկազմի առնվազն 30 տարի», – նշել է Շևցովը։
Նա ընդգծել է, որ 2025 թվականին ՆԱՏՕ-ի երկրներն անցկացրել են ավելի քան 100 ռազմական վարժանքներ, որոնց մեծ մասը՝ արևելյան թևում։
«Այս պայմաններում ՀԱՊԿ-ն ու ՇՀԿ-ն՝ տարածաշրջանային անվտանգության և համագործակցության ապահովման հիմնական մեխանիզմները, շարունակում են իրականացնել Եվրասիայում կայունության ամրապնդմանն ուղղված որոշումների շարք», – նշել է Շևցովը։
Նրա խոսքով՝ ՀԱՊԿ-ի և ՇՀԿ-ի շրջանակներում համագործակցությունը կարող է և պետք է ծառայի որպես Եվրասիական տարածքում հավասար և անբաժանելի անվտանգության ճարտարապետության ստեղծման հիմք։
«Սա շատ լավ հարթակ է համագործակցության և անվտանգության ապահովման համար, ոչ միայն ռազմական, այլև տնտեսական իմաստով, քանի որ վերջին իրադարձությունները հստակ ցույց են տալիս, որ միայն ռազմական ուժով հնարավոր չէ հասնել նպատակներին։ Դրա մասին է վկայում նաև Իրանի դեմ ԱՄՆ-ի և Իսրայելի ռազմական գործողությունը, որտեղ Իրանը ցույց տվեց ամբողջ աշխարհի վրա ազդելու իր կարողությունը, և սա այլևս տարածաշրջանային խնդիր չէ, գլոբալ է», – ասել է Շևցովը։
