Կանադան ամերիկյան ապրանքների համար սահմանել է 50% «հայելային» մաքսատուրքեր
Կանադան ամերիկյան ապրանքների համար սահմանել է 50% «հայելային» մաքսատուրքեր․ հայտնում է BBC-ն։
Ցուցակում ներառված են մոտ 20 միլիարդ դոլարի ապրանքներ՝ պողպատից մինչև մարզաշապիկներ:
Սկզբում ցուցակում ներառված են եղել նաև թարմ ձուկ և ծովախեցգետին, սակայն դրանք հանվել են տեղի ձկնորսների բողոքի պատճառով: Սա ցույց է տալիս Օտտավայի դժվարությունը Վաշինգտոնին արձագանքելու հարցում՝ միաժամանակ պահպանելով ներքին հավասարակշռությունը:
Երկու կողմերի պաշտոնյաները ցանկություն են հայտնում համաձայնության գալ: Այնուամենայնիվ, օգոստոսի վերջին տեղի ունեցած խափանումից հետո նոր բանակցություններ չեն սկսվել:
Վարչապետ Մարկ Քարնին վերջերս հայտարարել է, որ Կանադան դեռևս ակնկալում է երկարաժամկետ համաձայնագիր Միացյալ Նահանգների հետ: Նա ընդգծել է, որ իր երկիրը պատրաստ է երկխոսության, հենց որ ամերիկացիները պատրաստ լինեն:
Մյուս կողմից՝ ԱՄՆ առևտրային ներկայացուցիչ Ջեյմիսոն Գրիրը հայտարարել է, որ գնդակը Կանադայի դաշտում է: Նա նշել է, որ Միացյալ Նահանգներն առաջարկել է ավելի լավ պայմաններ, բայց Օտտավան մերժել է դրանք: Պաշտոնյան նաև սպառնացել է պատասխան միջոցներով: Նա զգուշացրել է, որ Վաշինգտոնը կարող է արգելք դնել որոշ կանադական ապրանքների ներմուծման համար:
