Հայաստանի վարչապետ Նիկոլ Փաշինյանը դժվար թե կամավոր հրաժարական տա Երևանում հակակառավարական ցույցերի ֆոնին․ Lenta.ru-ի հետ զրույցում նշել է փորձագետ Անդրեյ Արեշևը։
«Ամեն ինչ կախված է ցուցարարների վճռականությունից և նրանից, թե որքանով են նրանք կազմակերպված, որքանով են պատրաստ հետևել ուրվագծված նպատակներին», – նշել է փորձագետը։ Նրա կարծիքով՝ իրավիճակը բավականին լուրջ է, սակայն չի կարելի թերագնահատել ուժային ռեսուրսն ու արտաքին աջակցությունը, որը ցուցաբերվում է Փաշինյանին։ Արեշևի խոսքով՝ կարևորն այն է, թե արդյո՞ք ձևավորվող բողոքի շարժումը կկարողանա որևէ կառուցողական այլընտրանք առաջարկել Ադրբեջանի և Թուրքիայի բոլոր պահանջների բավարարման կուրսին, որոնք այժմ պաշտպանում և հետևողականորեն իրականացնում են Փաշինյանն ու իր կառավարությունը։
«Միասնություն» շարժման առաջնորդ Արման Վարդանյանն «EADaily»-ի թղթակցի հետ զրույցում նշել է, որ բողոքի շարժման վերջնական նպատակը Փաշինյանի հեռանալն է, իսկ ժողովուրդը արտահերթ ընտրությունների միջոցով կձևավորի նոր հայրենասիրական և պրոֆեսիոնալ իշխանություն։
«Ավելի քան վստահ եմ, որ Բագրատ Սրբազանը դարձել է անխոցելի։ Նրան վարկաբեկելու բազմաթիվ անհաջող փորձերը հանգեցրել են նրան, որ նա ձեռք է բերել անձեռնմխելիություն և նույնիսկ այն փոխանցել ամբողջ ժողովրդական շարժմանը։ Իսկ երբ իշխանություններն առաջ են քաշում իրենց անհեթեթ տեսությունները «հետախուզական ցանցի» մասին, հարց է առաջանում՝ տղերք, ո՞ւմ գործակալներն եք, ո՞ր երկրին եք ծառայում։ Սա առաջինն է, և երկրորդը, եթե իշխանություններն այս ամենին այդքան լուրջ են վերաբերվել, թող դուրս գան և բաց երկխոսություն վարեն ժողովրդի հետ», – նշել է Վարդանյանը՝ հավելելով, որ եթե Փաշինյանն ու իր թիմը գոնե նվազագույն ինտելեկտ, բարոյականություն ու մի փոքր էլ հայրենասիրություն ունենային, պետք է ինքնակամ հրաժարվեին իշխանությունից ու հրաժարական տային։ Նրա խոսքով՝ միջին հաշվով ժողովրդի 70-80%-ը համաձայն է շարժման գաղափարներին և նպատակներին։
