Քրիստին Լագարդը փետրվարին կթողնի Եվրոպական կենտրոնական բանկի նախագահի պաշտոնը
Քրիստին Լագարդը հայտարարել է, որ փետրվարի 7-ին կթողնի Եվրոպական կենտրոնական բանկի (ԵԿԲ) նախագահի պաշտոնը՝ վերջ դնելով իր ապագայի վերաբերյալ ամիսներ շարունակվող ենթադրություններին և ազատելով Եվրոպայի ամենաազդեցիկ հաստատություններից մեկի ղեկավար պաշտոնը․ գրում է Politico-ն։
«Այս հաստատությունում ծառայելն ինձ համար մեծ հպարտություն է եղել։ Շնորհակալություն եմ հայտնում բոլոր նրանց, ովքեր աջակցել են ինձ այս 7 տարվա ընթացքում»,- նշել է Լագարդը։
ԵԿԲ-ն առայժմ մանրամասներ չի հայտնել պաշտոնը թողնելուց հետո Լագարդի ծրագրերի վերաբերյալ։ Այս հայտարարությունը ճանապարհ է հարթում ԵՄ անդամ երկրների մայրաքաղաքների միջև ձեռք բերվելիք համաձայնության համար, որը վերաբերում է ԵԿԲ-ի 6 անդամից բաղկացած Գործադիր խորհրդի նշանակումներին։
Իզաբել Շնաբելը հունվարին կթողնի իր պաշտոնը՝ Արժույթի միջազգային հիմնադրամում բարձր պաշտոն զբաղեցնելու համար, իսկ գլխավոր տնտեսագետ Ֆիլիպ Լեյնի պաշտոնավարման ժամկետը կավարտվի մայիսին։
Սա նաև հնարավորություն է տալիս Ֆրանսիայի նախագահ Էմանուել Մակրոնին՝ ազդելու Լագարդին փոխարինողի ընտրության վրա՝ նախքան հաջորդ տարի Ֆրանսիայում կայանալիք նախագահական ընտրությունները։
«ԵԿԲ-ի հաջորդ ղեկավարությանն իշխանության սահուն փոխանցումն ապահովելու նպատակով՝ նրան փոխարինողի նշանակման գործընթացը կմեկնարկի այսօր և կընթանա առանց հապաղման», - հայտարարել է Եվրոպական խորհրդի նախագահ Անտոնիու Կոշտան՝ շնորհակալություն հայտնելով Լագարդին իր «նվիրվածության» և ղեկավարման համար։
