Արտասահմանյան լրագրողներին հավատարմագրերից զրկելը նպատակ ունի Ադրբեջանին էլ ավելի մեկուսացնել արտաքին վերահսկողությունից. RSF
Ադրբեջանի իշխանությունները վերջերս չեղյալ է հայտարարել արտասահմանյան լրատվամիջոցներից մի քանի լրագրողների հավատարմագրումը` վկայակոչելով «փոխադարձության» կեղծ փաստարկը:
«Լրագրողներ առանց սահմանների» կազմակերպությունը (RSF) դատապարտում է այս կամայական որոշումը, որը սրում է ավտորիտար ռեժիմի կողմից մամուլի ազատության դեմ ճնշումը, և կոչ է անում անհապաղ վերականգնել լրագրողների հավատարմագրումները։ Վերջին մեկ ամսվա ընթացքում օտարերկրյա լրատվամիջոցներում աշխատող լրագրողներին արգելել են լուրերի լուսաբանումն Ադրբեջանում, քանի որ երկրի իշխանությունները հետ են կանչել հավատարմագրերը, ինչը նրանց համար իրավականորեն անհնար է դարձնում շարունակել աշխատանքը:
Բրիտանական հեռարձակող ընկերությունը (BBC), որը 1994 թվականից լուրեր է ներկայացնում Ադրբեջանից, փետրվարի 13-ին ստիպված է եղել փակել Բաքվի գրասենյակը: Ամերիկյան Bloomberg գործակալության և Voice of America-ի աշխատողները նույնպես բախվել են հավատարմագրերի չեղարկմանը: Բրիտանական Reuters լրատվական գործակալության ներկայացուցիչը RSF-ին հաստատել է, որ «Reuters-ում աշխատող երկու անկախ լրագրողներ այլևս հավատարմագրված չեն Ադրբեջանում՝ կառավարության նոր քաղաքականության պատճառով, որը յուրաքանչյուր օտարերկրյա լրատվամիջոցի տրամադրում է միայն մեկ հավատարմագիր: Ադրբեջանի Արտաքին գործերի նախարարությունն այս միջոցները հիմնավորում է «փոխադարձության» սկզբունքով՝ նպատակ ունենալով հավասարակշռել Ադրբեջանում օտարերկրյա լրագրողների թիվը արտասահմանում գտնվող ադրբեջանցի լրագրողների հետ։ Սակայն այն, ինչ Բաքուն անվանում է «ադրբեջանական լրագրողներ», իրականում պետական վերահսկողության տակ գտնվող լրատվամիջոցների ներկայացուցիչներ են։
«Լրագրողները չպետք է օգտագործվեն դիվանագիտական հակամարտություններում, առավել ևս՝ «փոխադարձության» կեղծ պատրվակով: Այս կամայական որոշումները ևս մեկ ծանր հարված են մամուլի ազատությանը և ձգտում են Ադրբեջանին էլ ավելի մեկուսացնել արտաքին վերահսկողությունից: Մենք կոչ ենք անում իշխանություններին անհապաղ վերականգնել չեղյալ համարված հավատարմագրերը և երաշխավորել, որ օտարերկրյա լրատվամիջոցներն ազատ են աշխատելու լիակատար խմբագրական անկախությամբ», – հայտարարել է Ժաննա Կավելիերը՝ RSF Արևելյան Եվրոպայի և Կենտրոնական Ասիայի գրասենյակի ղեկավարը: Արտասահմանյան լրատվամիջոցները սահմանափակելուց բացի, իշխանությունները մեծացնում են ճնշումը տեղական անկախ մամուլի վրա։ Turan լրատվական գործակալությունը՝ երկրում վերջին անկախ տեղական լրատվամիջոցը, ստիպված է եղել դադարեցնել իր լրագրողական գործունեությունը փետրվարի 13-ին՝ որպես փակման պաշտոնական պատճառ նշելով «տնտեսական պատճառները»: Թեև կայքն ի սկզբանե պահպանվել է գործունեությունը դադարեցնելուց հետո, այն այժմ այլևս հասանելի չէ:
