Կոնֆլիկտի նոր փուլ, որտեղ հատվում են քաղաքականությունը, կրոնն ու արդարադատությունը. ռուսական մամուլի անդրադարձը ՀՀ-ի իրադարձություններին
Ռուսական մամուլն ակտիվորեն լուսաբանել է նախորդ օրը ՀՀ-ում գործարար Սամվել Կարապետյանի պաշտպանությանը նվիրված հանրահավաքը:
Մասնավորապես, РИА Новости-ն գրել է, որ Երևանում անցկացված հանրահավաքն անցել է առանց միջադեպերի։ Գործակալության թղթակիցը հաղորդել է, որ «Մեր ձևով» շարժումը, որը գլխավորում է Հայաստանում կալանավորված գործարար Սամվել Կարապետյանը, ուխտագնացություն է կազմակերպել դեպի Հայ առաքելական եկեղեցու հոգևոր կենտրոն՝ Մայր Աթոռ Սուրբ Էջմիածին՝ որպես եկեղեցուն աջակցության դրսևորում՝ կառավարության հարձակումների ֆոնին։
Շարժման ներկայացուցիչներից բացի, հանրահավաքին մասնակցել են նաև ընդդիմադիր պատգամավորներ և քաղաքական գործիչներ։
ТАСС գործակալությունը մեջբերել է շարժման՝ սոցցանցերում հրապարակված կոչը. «Եկե՛ք ցույց տանք, որ Էջմիածինն անպաշտպան չէ։ Հայերը միշտ պաշտպանել են և կշարունակեն պաշտպանել Էջմիածինը մե՛ր ձևով»։
Բացի այդ՝ նշվել է, որ «Մեր ձևով» շարժման համակարգող խորհրդի ղեկավար, «Տաշիր» ընկերությունների խմբի փոխնախագահ և ռուս գործարարի եղբորորդի Նարեկ Կարապետյանը լրագրողների հետ զրույցում հրաժարվել է պատասխանել քաղաքական հարցերի։ «Այսօր մենք եկել ենք ուխտագնացության, և այսօր ես ձեռնպահ կմնամ որևէ քաղաքական հարցի պատասխանելուց։ Մենք կաղոթենք մեր վերջնական համերաշխության համար», – նշել է Նարեկ Կարապետյանը։
RT-ն զրուցել է հայ փորձագետների և քաղաքական գործիչների հետ, որոնք նշել են, որ ոմանք արդեն սկսել են Հայաստանում տեղի ունեցողն անվանել «քաղաքացիական սառը պատերազմ»։
Նրանց կարծիքով՝ ՀՀ վարչապետ Նիկոլ Փաշինյանը փորձում է չեզոքացնել իր պոտենցիալ մրցակիցներին, այդ իսկ պատճառով՝ երկրում սկսվել են զանգվածային ձերբակալություններ։ Ըստ գործակալության հետ զրուցած մասնագետների՝ ՀՀ վարչապետը ցանկանում է նաև երկրում վախի մթնոլորտ ստեղծել։
Բացի այդ՝ քաղաքացիները հոգնել են «համարվել լուռ զանգված, որին կարելի է կերակրել ցանկացած անհեթեթությամբ»։
НТВ-ն նշել է, որ բողոքի ակցիայի մասնակիցները, որոնց թիվը, տարբեր աղբյուրների համաձայն, հասնում էր մինչև 25,000-ի, հավաքվել էին Ազատության հրապարակում: Մասնակիցների թվում էին Հայաստանի ընդդիմության անդամներ, ակտիվիստներ և սովորական քաղաքացիներ: Նրանք պաստառներ էին պահում, որոնցում կոչ էին անում ազատ արձակել գործարարին նախնական կալանքից՝ վանկարկելով «ազատություն» բառը:
Ավելի վաղ Deutsche Welle-ի ռուսական ծառայությունը գրել էր, որ Հայաստանում բռնկվել է իշխանությունների և Հայ առաքելական եկեղեցու միջև հակամարտության նոր փուլ, որտեղ հատվում են քաղաքականությունը, կրոնը և արդարադատությունը։ Երևանի իշխանությունները պնդում են, որ գործում են խստորեն օրենքի շրջանակում, մինչդեռ եկեղեցու ներկայացուցիչների կարծիքով՝ այս ամենը խղճի ազատության խախտման և դրա ազդեցությունը խաթարելու փորձի մասին է։ 2026 թվականի խորհրդարանական ընտրությունների մոտենալուն զուգընթաց՝ այս հակամարտությունը ստանում է ոչ միայն հոգևոր, այլև՝ քաղաքական երանգ։
