Մակրոնը «գողացավ» ուշադրությունը ՀՀ այցելած այլ առաջնորդներից․ ի՞նչ է գրում արևմտյան մամուլը 

Հայաստանը շարունակում է մնալ արևմտյան մամուլի ուշադրության կենրոնում։

Euobserver-ը գրել է՝ ԵՄ-ը և Հայաստանը ցուցադրել են իրենց խորացող ռազմավարական կապերը, քանի որ Ռուսաստանի և ԱՄՆ-ի ագրեսիան խթանում է ընդլայնման նկատմամբ հետաքրքրությունը։ Երևանի գագաթնաժողովը տեղի է ունենում ԵՄ ընդլայնման նոր թափի ֆոնին։ Փոքր և նման մտածողությամբ երկրները միավորվում են՝ ի պատասխան Եվրոպայում շարունակվող ռուսական ագրեսիայի և ԱՄՆ-ի նախագահ Դոնալդ Թրամփի օրոք անկայունության։

Euractiv-ը շեշտել է, որ այս շաբաթ Հայաստանը վճռական քայլ կատարեց դեպի Եվրամիություն՝ հյուրընկալելով հաջորդական գագաթնաժողովներ, որոնք նոր համաձայնագրեր, ֆինանսավորման խոստումներ և վիզային ռեժիմի ազատականացման խթան բերեցին: ԵՄ առաջնորդները խրախուսեցին Հայաստանի առաջարկները քաղաքական և տնտեսական նախաձեռնությունների փաթեթով, այդ թվում՝ ԵՄ-ի և Հայաստանի միջև նոր կապի գործընկերությամբ և ճանապարհորդության սահմանափակումների մեղմացմանն ուղղված քայլերով: Մինչդեռ Հայաստանը դեռևս պաշտոնապես մնում է ՀԱՊԿ անդամ։ Այդուամենայնիվ, վերջին տարիներին Ռուսաստանի հետ հարաբերությունները թուլացել են: Հայաստանում դեռևս տեղակայված է Ռուսաստանի միակ ռազմական բազան Հարավային Կովկասում, սակայն ռուսական անվտանգության ներկայությունը զգալիորեն կրճատվել է: Ռուս սահմանապահները նաև լքել են Երևանի միջազգային օդանավակայանը և Ադրբեջանի հետ նրա հարավային սահմանների մի մասը:

Այս համատեքստում` Երևանի և Մոսկվայի միջև հարաբերությունները սառել են, քանի որ Հայաստանն ավելի սերտ համագործակցության համար դիմել է ԵՄ-ին և Միացյալ Նահանգներին: Ռուսաստանի նախագահ Վլադիմիր Պուտինն անցյալ ամիս Մոսկվայում կայացած անձնական հանդիպման ժամանակ բացահայտորեն քննադատեց Փաշինյանին ԵՄ-ին սիրահետելու համար:

Euronews-ի դիտարկմամբ՝ Ֆրանսիայի նախագահ Էմանուել Մակրոնի այցը նշանավորեց տեսանելի տեղաշարժ Հայաստանի համար, քանի որ նա հռչակեց «Եվրոպա, որը տարածվում է Իսլանդիայից մինչև Կովկաս»՝ միաժամանակ ողջունվելով ծափահարություններով, երգելով «Ազնավուր» և ստանալով մեդալ։

Երբ տասնյակ եվրոպացի առաջնորդներ այս շաբաթ հավաքվել էին Երևանում՝ Եվրոպական քաղաքական համայնքի գագաթնաժողովին մասնակցելու համար, հենց Ֆրանսիայի նախագահ Էմանուել Մակրոնն էր, որ հիանալի ժամանակ էր անցկացնում՝ օգտագործելով այս առիթը՝ հռչակելու Հայաստանի «նոր դարաշրջանը» Եվրոպայի հետ, երբ խաղաղություն է հաստատվում Հարավային Կովկասում։

Հայաստանում Մակրոնը եղել է Ռուսաստանից դեպի Եվրոպա Երևանի շրջադարձի շարժիչ ուժը։

The Guardian-ն ընդգծել է, որ Մակրոնը աջակցում է Հայաստանի եվրոպամետ վարչապետին։ Ֆրանսիայի նախագահը պաշտպանում է Նիկոլ Փաշինյանին, ով հաջորդ ամիս ընտրություններում լուրջ մարտահրավերի է բախվելու ռուսամետ կուսակցությունների կողմից։ Մակրոնը նախընտրական հայտարարություն է արել՝ հաջակցություն Հայաստանի վարչապետ Նիկոլ Փաշինյանի՝ ասելով, որ երկրի ճակատագիրը Եվրոպայի հետ է։

The Washington Post-ը, The Washington Times-ը և The Associated Press-ը գրել են, որ Ֆրանսիայի նախագահ Էմանուել Մակրոնը այս շաբաթ Հայաստանի մայրաքաղաքում գտնվող աշխարհի մյուս առաջնորդներից խլեց ուշադրության մի մասը՝ պետական ընթրիքի ժամանակ կատարելով դասական բալլադներ, այդ թվում՝ «Լա Բոհեմը»։

BBC-ին նշել է, ԵՄ առաջնորդները հավաքվել էին Եվրոպական քաղաքական համայնքի (ԵՔՀ) գագաթնաժողովին՝ միասնություն ցուցադրելու համար։ Դոնալդ Թրամփի հարցը նրանց համար հիմնական գործոնն էր, չնայած քաղաքական գործիչները նախընտրեցին չհիշատակել ԱՄՆ նախագահին։