Նասրալլան չի տուժել Իսրայելի ՌՕՈւ հարձակման ժամանակ․ Tasnim

«Հեզբոլլահի» գլխավոր քարտուղար Հասան Նասրալլան և շարժման գործադիր կոմիտեի ղեկավար Սեյեդ Հաշեմ Սաֆիեդդինը չեն տուժել Իսրայելի ՌՕՈւ հարվածից, որը հասցվել է Բեյրութում գտնվող շտաբ-բնակարանին։ Այս մասին հայտնում է իրանական Tasnim գործակալությունը, հղում անելով իրազեկ աղբյուրներին։

Նշվում է, որ երկուսն էլ ամբողջովին առողջ են։

«Աղբյուրները հայտնել են Tasnim-ի Լիբանանի թղթակցին, որ Լիբանանի դիմադրության շարժման բարձրագույն առաջնորդներից ոչ ոք չի զոհվել սիոնիստական ռեժիմի կողմից սկսված դաժան ահաբեկչական գործողության արդյունքում, որը տեղի է ունեցել ուրբաթ երեկոյան։ Նրանք հաստատել են, որ այսօրվա սիոնիստական գործողությունը ձախողվել է»։

Այս տեղեկությունը հրապարակվել է այն բանից հետո, երբ սոցիալական ցանցերում լուրեր էին տարածվել, որ Նասրալլան և Սաֆիեդդինը դարձել են թիրախ լայնամասշտաբ օդային հարձակման ժամանակ։

Միևնույն ժամանակ, արաբական լրատվամիջոցները նույնպես հաղորդում են, որ Իսրայելի ռմբակոծության հետևանքով Լիբանանի Հըզբոլլահ խմբավորման ոչ մի բարձրաստիճան պաշտոնյա չի տուժել։