Իլհամ Ալիևի դիրքորոշումը ուկրաինական հարցում խորապես թերի է. Պեսկով
Ռուսաստանն ու Ադրբեջանը տարբեր տեսակետներ ունեն Ուկրաինայի իրավիճակի վերաբերյալ, սակայն Մոսկվան պրագմատիկ մոտեցում է ցուցաբերում և անհրաժեշտ չի համարում երկկողմ հարաբերությունները նման գնահատականների հետ կապելը․ ճեպազրույցի ժամանակ նշել է Ռուսաստանի նախագահի մամուլի քարտուղար Դմիտրի Պեսկովը։
«Կան մի շարք պետություններ, որոնց հետ մենք սերտ հարաբերություններ ունենք և որոնք կիսում են այս դիրքորոշումը, դիրքորոշում, որի հետ մենք կտրականապես համաձայն չենք։ Այո՛, սա մեր անհամաձայնության առարկան է», – հայտարարել է նա։
«Միևնույն ժամանակ, մենք կարծում ենք, որ սա պատճառ չէ, որ այս հարցը ստվեր գցի մեր երկկողմ հարաբերությունների վրա: Մենք կարծում ենք, որ պետք է զարգացնենք մեր հարաբերությունները բոլոր հնարավոր ձևերով, հատկապես այնպիսի երկրի հետ, ինչպիսին է Ադրբեջանը», – հավելել է Կրեմլի խոսնակը։
Պեսկովն ընդգծել է, որ Ադրբեջանի նախագահ Իլհամ Ալիևի դիրքորոշումը ուկրաինական հարցում խորապես թերի է։ Մոսկվան կշարունակի հետևողականորեն և համոզիչ կերպով բացատրել իր տեսակետը այս հարցի վերաբերյալ:
