Ամեն ինչ վկայում է այն մասին, որ ռուսական թևավոր հրթիռը հարվածել է Լեհաստանին․ Տուսկ

Հինգշաբթի վաղ առավոտյան Ուկրաինայի վրա Ռուսաստանի վերջին հարձակման ժամանակ օբյեկտ է կործանվել Լեհաստանի արևելքում՝ թողնելով 10 մետր լայնությամբ խառնարան և ցրված բեկորներ. հայտնել են լեհական իշխանությունները։

Politico-ի փոխանցմամբ՝ Ուկրաինայի արտաքին գործերի նախարար Անդրեյ Սիբիհան X-ում հայտարարել է, որ դա «ռուսական Kh-101 թևավոր հրթիռ» է, որը խախտել է ՆԱՏՕ-ի օդային տարածքը։

Լեհաստանի վարչապետ Դոնալդ Տուսկը, որը հինգշաբթի առավոտյան այցելել է դեպքի այդ վայր, կարծես, համաձայնել է՝ նշելով, որ Լեհաստանը «պատրաստ էր խոցել հրթիռը, եթե այն շարունակեր թռիչքը»։ Ամեն ինչ ցույց է տալիս, որ դա ռուսական Kh-101 թևավոր հրթիռ է եղել։

Երկրի օպերատիվ հրամանատարության տվյալներով՝ օբյեկտը հայտնաբերվել է Լեհաստանի օդային տարածքով արևմուտք շարժվելիս՝ ժամը 3:40-ին։ F-16 կործանիչ է ուղարկվել այն նույնականացնելու և որսալու համար, սակայն օբյեկտն անհետացել է ռադարներից 6 րոպե անց, նախքան այն կնույնականացվեր։ Հետագայում Մի-24 հարձակողական ուղղաթիռը հայտնաբերել է հավանական վթարի վայրը՝ ուկրաինական սահմանի մոտ գտնվող Լյուբլինի նահանգում։

Ոստիկանությունը մոտակա շենքերից մոտ 2 կիլոմետր հեռավորության վրա գտնվող դաշտում խառնարան և բեկորներ է հայտնաբերել, երբ բնակիչները հայտնել են ուժեղ պայթյունի մասին։ Զոհերի մասին տեղեկություններ չկան։

«Սա ևս մեկ անգամ հստակ ցույց է տալիս, որ Ուկրաինայի օդային պաշտպանության ամրապնդումը հիմա հրատապ է և ծառայում է որպես ամբողջ եվրաատլանտյան համայնքի պաշտպանության երաշխիք», – X-ում գրել է Սիբիհան։

ԵՄ խորհրդի նախագահ Անտոնիու Կոշտան «Ռուսաստանի ագրեսիան» որակել է որպես «սպառնալիք ամբողջ Եվրոպայի անվտանգությանը»։

Ուկրաինայի նախագահ Վլադիմիր Զելենսկին սոցցանցերում հաստատել է, որ հարվածների ժամանակ զոհվել է 8 մարդ՝ հավելելով, որ զոհերի թվում են Դնեպրի շրջանում գտնվող 3 երեխա և նրանց ծնողները։ Նա նաև կրկնել է Ուկրաինայի դաշնակիցներին օգնության կոչը։

«Օգնության և հակաբալիստիկ հրթիռների մատակարարման ուշացումները հանգեցնում են այսպիսի ավերածությունների, այսպիսի զոհերի, որոնք, ցավոք, մենք տեսնում ենք այսօր», – գրել է նա։