Վերջին գենետիկական ուսումնասիրությունները ցույց են տվել, որ ռուսներն ու ուկրաինացիները մեկ ժողովուրդ են․ Պուտին
ВГТРК-ի թղթակից Պավել Զարուբինին տված հարցազրույցում Վլադիմիր Պուտինն առաջին անգամ մեկնաբանել է Դոնալդ Թրամփի հատուկ ներկայացուցիչ Սթիվ Ուիթքոֆի հետ վերջին բանակցությունները և արտահայտել Ռուսաստանի դիրքորոշումը։
Պուտինի խոսքով՝ Ռուսաստանը համաձայնության է եկել ԱՄՆ ներկայացուցիչների հետ, որ պատրաստ է վերսկսել եռակողմ շփումները։
«Այս բանակցությունների նպատակը կլինի քննարկել Ուկրաինայի և Ռուսաստանի անվտանգության ապահովումը խաղաղության համաձայնագրի ձեռքբերումից հետո՝ և դրա վերջնական տեսքով, այլ ոչ թե ռազմական գործողությունների դադարեցման արդյունքում»,- ասել է նա։
Զարուբինը նաև հարցրել է Պուտինին Զելենսկիի՝ Fox News-ին տված հարցազրույցում արված այն հայտարարության մասին, որ նա պատրաստ է հակամարտության սառեցմանը շփման գծի երկայնքով՝ Ուկրաինայի տարածքի 75%-ի պահպանմամբ։ Պուտինը պատասխանել է, որ դա «նրանց տարածքը չէ, դա պատմական Ռուսաստանի տարածքն է»։
Պուտինը նաև հայտարարել է, որ պատերազմ է ուզում ոչ թե Ռուսաստանը, այլ Ուկրաինան։
«Մենք չենք ուզում կռվել Ուկրաինայի հետ։ Եթե Ուկրաինայի ներկայիս ղեկավարությունը ցանկանում է կռվել, թող կռվի, բայց ինչո՞ւ է կարծում, որ բոլորը պետք է վճարեն դրա համար և զենք մատակարարեն նրանց։ Մենք հիմա էլ պատրաստ ենք բանակցել և լուծում փնտրել այս դժվարին իրավիճակում։ Նրանք մեզ շատ մտերիմ մարդիկ են։ Վերջին գենետիկական ուսումնասիրությունները ցույց են տվել, որ ռուսներն ու ուկրաինացիները մեկ ժողովուրդ են»,-ասել է ՌԴ ղեկավարը։
