Ցավալի է, բայց ևս մեկ կեղծիք ջրից չոր դուրս կգա. Աննա Ստեփանյանն անդրադարձել է իր 13-ամյա երեխային ավտոբուսից իջեցնելու միջադեպին
Քանի որ դեպքը լայն հնչեղություն ստացավ, պարտավոր եմ տեղյակ պահել նաև զարգացումների մասին. Facebook-ում գրել է Աննա Ստեփանյանը, ով երեկ ներկայացրել էր դեպքի մանրամասները։
«Քիչ առաջ երկարատև զրույց ունեցա «Երևանի ավտոբուս» ՓԲԸ-ի մամուլի խոսնակ Գեղամ Ասատրյանի հետ։
Ուզում եմ հատուկ ընդգծել նրա պատրաստակամությունը՝ միշտ լսելու, կապի մեջ լինելու և կատարվածը հնարավորինս օբյեկտիվ հասկանալու համար։ Ցավոք, պարզվեց, որ դա այնքան էլ հեշտ գործ չէ, որոհետև, ի բարեբախտություն հսկիչի, ավտոբուսում տեսախցիկներ չեն եղել, ինչից էլ հսկիչ «տիկինը» լիարժեք օգտվել է՝ խեղաթյուրելով ողջ իրականությունը։
Ահա թե ինչպես․ ըստ նրա՝ իմ 13 տարեկան աղջիկն «ասել է, որ ինքը 17 ՏԱՐԵԿԱՆ Է» (դրա համար էլ իբր անձնագիր է պահանջել)։ Իսկ հաջորդ «արտառոց» պնդմամբ՝ երեխային ոչ թե ինքն է իջեցրել, այլ աղջիկս է ասել, թե «ինքն ԱՅՍՏԵՂ Է ԻՋՆՈՒՄ»։ Եվ սա այն դեպքում, երբ ավտոբուսը գտնվել է «Ռոսիա» կինոթատրոնի կանգառում, իսկ մենք բնակվում ենք Ավանում․․․
Այստեղ է, որ տրամաբանությունը վերջնականապես ավարտվում է, քանի որ նույն «չիջեցնող» տիկինը երևի մոռացել էր, որ ինձ հետ հեռախոսազրույցում ուղղակիորեն ասել էր, որ ինքն է իջեցրել երեխային՝ քարտը լիցքավորելու համար։
Դե արի ու ապացուցիր, որ ապացուցես․․․ Փաստորեն, ըստ հսկիչի վարկածի, իմ երեխան ո'չ իր տարիքը գիտի, ո'չ տան տեղը, ոչ էլ երևի անունը։ Հավանաբար արդեն պետք է մտածեմ, որ այդ տիկինն ինքն էլ առհասարակ գոյություն չի ունեցել, և երեխայիս երևակայության արդյունքն է եղել․․․
Ցավալի է, բայց ևս մեկ ԿԵՂԾԻՔ ջրից չոր դուրս կգա։ Եվ դրանում վստահ եմ, որովհետև ունեմ բոլոր օբյեկտիվ պատճառները մտածելու, որ նա նույնիսկ հասարակ դիտողության անգամ չի արժանանա։
«Շնորհակալություն» տեսախցիկների բացակայությանը․․․»,- գրել է օգտատերը։
