Այսօր տեղի ունեցածը խտրական արդարադատության հերթական դրսևորումն է. անդրադառնալով ՀՀ ԱԳՆ շենքի մոտ տեղի ունեցած բախման ընթացքում բերման ենթարկվածների խնդրին՝ ասաց «Հինգ իրավապաշտպանների» նախաձեռնության անդամ, փաստաբան Սերգեյ Հարությունյանը:
«Եթե մի քանի օր առաջ 40 կարմիրբերետավոր բիրտ ուժ կիրառելով, խուլիգանաբար պատգամավորի էր ծեծում, այդ դեպքում ոչ մի գործողություն մինչև այս պահը չկա, ընդամենը կասեցված է մեկ ոստիկանի գործունեոությունը, բայց այսօրվա պարագայում ստեղծվել է քննչական խումբ, արագացված կերպով աշխատում են, արդեն 29 անձ ձերբակալված է, վերջին 4 տարիներին մենք բախվում ենք խտրական արդարադատությանը, այսօր կրկին արդեն ցայտուն, ցցուն կերպով տեսնում ենք, թե ինչ է կատարվում»,-ասել է փաստաբանը:
Նա նշել է, որ այսօրվա դեպքից հետո կա 29 ձերբակալված, նրանցից 25-ը Կենտրոնի բաժնում են եղել, 4-ը՝ Շենգավիթի բաժնում: Նրանց թվում ոստիկանների գործողությունների, բռնության հետևանքով ծանր վիրավորում ստացած տղաներ կան:
Սերգեյ Հարությունյանը պատմել է, որ 2 ոստիկան մոտեցել են իրավապաշտպան Ռուբեն Մելիքյանին ու պնդել, որ նրանց սուր, ծակող գործիքներով խփել են, բայց շարժման անդամները միշտ են նշել՝ ով նման բան անի, շարժման հետ չէ:
«Մենք տեսնում ենք, որ ինչ-որ առարկաներ, շշեր են նետվում դեպի ոստիկանները և անմիջապես այդ րոպեին ոստիկանները գործողություն են սկսում Սրբազանի մոտ կանգնած նկատմամբ: Պարզ է չէ՞, որ սա ակնհայտ սադրանք է, կազմակերպված սադրանք է, որ վայրկյանական կողմնորոշվելով այդ գործողությունն արվեց»,-ասել է նա: