Նյու Յորքը չունի Նեթանյահուին ձերբակալելու իրավասություն, իսկ դաշնային իշխանություններն ունեն․ քաղաքապետ

Նյու Յորքի քաղաքապետ Զոհրան Մամդանին հայտարարել է, որ քաղաքը չունի Իսրայելի վարչապետ Բենիամին Նեթանյահուի նկատմամբ Միջազգային քրեական դատարանի ձերբակալության օրդերը կատարելու իրավասություն․ գրում է Euronews-ը։

Մամդանին, սակայն, նշել է, որ նման լիազորություն ունեն ԱՄՆ դաշնային իշխանությունները։

«Բենիամին Նեթանյահուն ռազմական հանցագործ է։ Նա պաղեստինցի ժողովրդի դեմ իրականացվող սարսափելի ցեղասպանության ճարտարապետն է», – սոցցանցերում հրապարակված տեսաուղերձում հայտարարել է Մամդանին։

Նա նշել է, որ համաձայն է Միջազգային քրեական դատարանի դիրքորոշման հետ, որ Նեթանյահուն պետք է ձերբակալվի և կանգնի դատարանի առաջ։ Մամդանիի խոսքով, սակայն, «օրենսդրությամբ նախատեսված բոլոր հնարավորությունները» ուսումնասիրելուց հետո քաղաքապետարանը եզրակացրել է, որ չունի այդ օրդերը կատարելու «անկախ իրավական լիազորություն»։

«Սակայն դաշնային կառավարությունն ունի նման իրավասություն», – շարունակել է Նյու Յորքի քաղաքապետը՝ հավելելով. «Կոչ եմ անում նրանց միանալ Միջազգային քրեական դատարանին և ի կատար ածել ձերբակալության օրդերը»։

Հիշեցնենք, որ ԱՄՆ նախագահ Դոնալդ Թրամփը նախօրեին հայտարարել էր, որ «Բենիամին Նեթանյահուն ոչ մի պարագայում չի ձերբակալվի, քանի դեռ գտնվում է Ամերիկայի Միացյալ Նահանգներում»։

Ավելի վաղ Մամդանին հայտարարել էր, որ չի բացառում Նեթանյահուի ձերբակալությունը, եթե վերջինս սեպտեմբերին այցելի ՄԱԿ-ի Գլխավոր ասամբլեայի նստաշրջանին։