ԱՄՆ-ում ոստիկանությունը ձերբակալել է Վաշինգտոնի փողոցներով գիլիոտինի նմանությամբ սարք տեղափոխող մարդու
ԱՄՆ Կապիտոլիումի ոստիկանությունը ձերբակալել է Վաշինգտոնի փողոցներով գիլիոտինի նմանությամբ սարք տեղափոխող վարորդին․ գրում է Euronews-ը՝ հղում անելով ոստիկանությանը։
Ոստիկանության հաղորդմամբ՝ 35-ամյա Ֆիլան-Թամ-Դույ Լեն ձերբակալվել և մեղադրվում է «վտանգավոր զենք կրելու» համար։
Տղամարդու՝ ապօրինի կայանված պիկապը ոստիկանները նկատել են Քեփիթոլ Հիլլ թաղամասի կենտրոնական հատվածով անցնող գլխավոր ճանապարհներից մեկում:
«Կասկածյալը մեքենայով այստեղ է եկել Կալիֆոռնիայից։ ԱՄՆ Կապիտոլիումի ոստիկանությունն ուսումնասիրում է կասկածյալի տվյալները՝ պարզելու՝ ինչու է նա եկել Վաշինգտոն», – ասվում է ոստիկանության հայտարարության մեջ։
Կապիտոլիումի ոստիկանության կայքում և սոցիալական ցանցերում հրապարակված լուսանկարներում երևում է պիկապի թափքում տեղադրված, կարծես իրական չափերի, փայտե գիլիոտին։ Պարզ չէ՝ արդյոք ոստիկանների առգրաված սարքը կիրառելի վիճակում է եղել։
