Ռուսական ռազմաբազան չի տեղավորվում Փաշինյանի՝ «դեպի Արևմուտք շրջադարձի» տրամաբանության մեջ․ «Московский Комсомолец»
Նոր էր վարչապետ Փաշինյանն ապշեցրել ընտրողներին իր հայտարարությամբ, թե «Ղարաբաղն ինչով էր մերը», քննադատության տակ է հայտնվել Գյումրիում գտնվող ռուսական 102-րդ ռազմաբազան․ գրում է «Московский Комсомолец»-ը:
Երկու հասարակական կազմակերպություն մեղադրել է ռազմաբազային Հայաստանի ընտրություններին միջամտելու համար: Մեղադրանքը տարածել են Փաշինյանին սատարող լրատվամիջոցները, ուստի՝ կասկած չկա, որ ռազմաբազային ուղղված ոտնձգության ազդանշանը եկել է «վերևից»:
Ըստ պարբերականի՝ եթե Փաշինյանին հաջողվի պահել իշխանությունը հունիսի 7-ի խորհրդարանական ընտրություններից հետո, Գյումրիի ռուսական ռազմաբազայի ճակատագիրը կորոշվի․ այն դուրս կբերվի Հայաստանից:
Ռազմաբազան չի տեղավորվում Փաշինյանի՝ «դեպի Արևմուտք շրջադարձի» տրամաբանության մեջ: Այն խանգարում է նաև Թուրքիային, որը ձգտում է փոխարինել Ռուսաստանին՝ որպես Հարավային Կովկասի տարածաշրջանի բոլոր գործընթացների գլխավոր մոդերատոր:
Ռազմաբազայի դուրսբերումը խնդիր է, որը կլուծվի Փաշինյանի հաջորդ ժամկետի ընթացքում, բայց դրա հիմքերն արդեն դրվել են:
Լրատվամիջոցն ընդգծում է, որ վերջերս Փաշինյանը վստահեցրել է, որ Հայաստանը «չունի որևէ ծրագիր, կամ որևէ հարց՝ կապված 102-րդ ռուսական ռազմաբազայի՝ Հայաստանի տարածքում գտնվելու հետ»։ Սակայն դեռևս 2018 թվականի մայիսի 9-ին՝ իշխանության գալուց անմիջապես հետո, նա Ղարաբաղի վերաբերյալ հայտարարել էր. «Արցախը Հայաստան է և վերջ»։ Իսկ հիմա նա ասում է բոլորովին այլ բան. «Ասում են՝ մենք հողեր ենք կորցրել։ Բայց ինչպե՞ս են այդ հողերը մերը եղել»։
