Իտալիայում Հայաստանի դեսպանությունը ներկայացրել է La Stampa պարբերականի անդրադարձը
Արցախում առկա իրավիճակին։
Հոդվածը սկսվում է Արցախի նախագահ Արայիկ Հարությունյանի խոսքերով։
«Իմ երկիրը վերածվել է հսկայական համակենտրոնացման ճամբարի, որն ամենակատարելագործվածն է Երկրորդ համաշխարհային պատերազմից հետո»։ Լեռնային
Ղարաբաղի նախագահ Արայիկ Հարությունյանի Եվրոպայի և աշխարհի հասցեին նետած խոսքերն
են՝ ժայռաքարի պես ծանր։ 2022 թվականի դեկտեմբերի 12-ից հայկական անկլավը փաստացի ամբողջովին
մեկուսացված է. Ադրբեջանը, որը շարունակում է հավակնել նրա ինքնիշխանությանը, փակել
է Լաչինի միջանցքը՝ միակ մուտքի ճանապարհը՝ կանխելով սննդամթերքի և առաջին անհրաժեշտության
ապրանքների մատակարարումները, օրական 400 տոննա ապրանք։
Անհնար խաղաղություն
Եվրոպան և Միացյալ Նահանգները բազմաթիվ կոչեր են արել՝ վերացնելու պաշարումը և
կանխելու հումանիտար արտակարգ դրությունը, կոչեր, որոնք անուշադրության են մատնվել:
«Եթե Հայաստանը համաձայնի ձեռնպահ մնալ Ադրբեջանի նկատմամբ տարածքային պահանջներից,
կարծում եմ, իսկապես հնարավոր կլինի խաղաղության պայմանագիր կնքել մինչև այս տարվա
վերջ։ Հակառակ դեպքում խաղաղություն չի լինի»,- հուլիսի 21-ին պարզաբանել է Ադրբեջանի
նախագահ Իլհամ Ալիևը։ Ուրեմն նորից պատերազմ կլինի, որովհետև Երևանը հազիվ թե իր ճակատագրին
մատնի Ղարաբաղը, հող, որտեղ հայկական և քրիստոնեական շատ խորը արմատների պաշտպանությունն
արդեն երեսունհինգ տարվա բախումների ընթացքում ավելի քան 30000 զոհ է արժեցել և ավելի
քան մեկ միլիոն ներքին տեղահանված մարդ։. Միևնույն ժամանակ, ադրբեջանական հարձակումը
շարունակվում է. կիրակի՝ օգոստոսի 6-ին, ուժգին ռմբակոծվել է հայկական ֆորպոստը։
Էթնիկ զտումներ
«Վերջին ամիսներին Ադրբեջանի ձեռնարկած բոլոր գործողությունները՝ սկսած կեղծ էկոակտիվիստների
(այդ թվում՝ «Գորշ գայլերի» թուրքական ահաբեկչական կազմավորման համախոհների ցույցերից
մինչև Լաչինում ապօրինի անցակետի տեղադրումը, ծրագրված են մեր բնակչության կյանքը անհնարին
դարձնելու համար։ Լեռնային Ղարաբաղում իրական էթնիկ զտումների գործողություններ են
ընթանում»,- դատապարտում է Հայաստանի արտաքին գործերի նախարարությունը։ «Մարդկանց,
տրանսպորտային միջոցների և ապրանքների ազատ տեղաշարժի իրավունքից զրկելը վստահաբար
ռասայական խտրականություն է» ըստ Հաագայի Միջազգային դատարանի հուլիսի 6-ի կայացրած
որոշման, որը Բաքվին կարգադրում է անհապաղ վերաբացել միջանցքը, մի որոշում, որը թղթի
վրա մնաց:
Կոչը
ՄԱԿ-ին
Հայաստանը դիմել է ՄԱԿ-ի Անվտանգության խորհրդին՝ «օգտագործելու
իր տրամադրության տակ եղած բոլոր գործիքները՝ ապահովելու Արդարադատության
միջազգային դատարանի հրամանների կատարումը, կանխելու մարդասիրական աղետը և
դադարեցնելու էթնիկ զտումները Լեռնային Ղարաբաղում»։ Հստակ են նաև Իտալիայում ՀՀ
դեսպան Ծովինար Համբարձումյանի հայտարարությունները. «Այլևս անհանդուրժելի է, որ
Ադրբեջանը շարունակում է անտեսել դատավճիռները, բանաձևերն ու հայտարարությունները՝
սիստեմատիկորեն խախտելով իր միջազգային պարտավորությունները»։ «Մենք դեռ չենք
կորցրել միջազգային իրավունքի գերակայության հույսը այն մութ ուժերի նկատմամբ,
որոնք ողջ մարդկության համար այս մռայլ օրերին փորձում են իրագործել իր
ազատությունը պարզապես սիրող ժողովրդի ցեղասպանությունը»: Երկրի ազատություն, որն
իր ստեղծման օրվանից խաղաղություն երբեք չի տեսել:
