ՄԱԿ-ի կլիմայական 29-րդ գագաթնաժողովն ավարտվել է գրեթե լիակատար ձախողմամբ. BBC
Երկիրը տաքանում է ռեկորդային մակարդակով, բայց մարդկությունն աստիճանաբար սառչում է թանկարժեք «կանաչ» հեղափոխության նկատմամբ: Ասվածի ևս մեկ ապացույցը Բաքվում կայացած COP29 մոլորակային կլիմայի ամենամյա հանդիպման արդյունքներն են, գրել է BBC-ին:
ՄԱԿ-ի քսանիններորդ գագաթնաժողովը ավարտվել է գրեթե լիակատար ձախողմամբ. հատկացված երկու շաբաթը բավարար չեղավ համաձայնության հասնելու համար, և գրեթե 200 երկրների պատվիրակներ ևս երկու օր և երկու գիշեր անցկացրին բանակցությունների սենյակներում, որտեղից նրանք դուրս եկան ուժասպառ և զայրացած: Արդյունքում՝ փոխզիջում գտնվել է, բայց գրեթե բոլորը դժգոհ են եղել։
Զարգացած տերությունները խոստացել են եռապատկել աղքատ երկրներին փոխհատուցումը՝ հասցնելով այն 300 միլիարդ դոլարի մինչև 2035 թվականը, սակայն քչերն են գոհ այս գումարից:
Արևմտյան քաղաքական գործիչների համար կլիմայական ճգնաժամի դեմ պայքարի ծախսերի աճը խոստանում է ընտրական խնդիրներ տանը, քանի որ վերջին տարիներին երկրների տնտեսությունների եկամուտներն ու գանձապետարանը խարխլվել են Covid-ով պայմանավորված գնաճի, ինչպես նաև էներգետիկ ճգնաժամի և Ռուսաստանի Ուկրաինա ներխուժման հետևանքների պատճառով: ԱՄՆ-ում կլիմայական նիհիլիստ Դոնալդ Թրամփի հաղթանակը «կանաչ» օրակարգի նկատմամբ արևմտյան ընտրողների վերաբերմունքի վառ օրինակ է։
300 միլիարդի չափից դժգոհ են նաև զարգացող երկրները։ Նախ, նրանք տարեկան ավելի քան 1 տրիլիոն դոլար էին պահանջում: Եվ երկրորդ՝ Արևմուտքը գրեթե մեկ տասնամյակ ուշացումով է կատարել տարեկան 100 միլիարդ հատկացնելու իր նախկին խոստումները, և այս անգամ ևս կասկածներ կան, որ զարգացած երկրները ժամանակին և ամբողջությամբ վճարելու փող կունենան։
ՄԱԿ-ի կլիմայի երրորդ անընդմեջ համաժողովն անցկացվել է մի երկրում, որն ապավինում է նավթի և գազի արդյունահանմանը: Եգիպտոսում COP27-ից հետո անցած տարվա համաժողովը հյուրընկալել էր Դուբայը, իսկ այս անգամ՝ Ադրբեջանը:
Եվ ամեն անգամ, նավթի և գազի արդյունաբերության լոբբիստների ձայնն ավելի բարձր է, քան հանածո վառելիքի հակառակորդների խմբերգը:
Ադրբեջանի նախագահ Իլհամ Ալիևը, ով հյուրընկալել է COP29-ը, մասնակիցներին ասել է, որ նավթն ու գազը «Աստծո նվերն են»:
Նման ղեկավարության ներքո ոչ ոք նույնիսկ հույս չուներ համոզել նավթային տերություններին, որ գագաթնաժողովից առաջ համաձայնագրի մեջ ներառեն հանածո վառելիքներից աստիճանաբար հրաժարվելու խոստումը:
Ավելին, մոլորակի գլխավոր նավթային տերությունը՝ ԱՄՆ-ն, նախագահական ընտրություններում Դոնալդ Թրամփի հաղթանակով խոստանում է դառնալ Փարիզի համաձայնագրով մեկնարկած Երկրի կանաչապատման գործընթացի գլխավոր հակառակորդը։
Արդյունքում՝ նավթային երկրները ձեռք են բերել առավելություն: Նավթով հարուստ Բաքվում կայացած գագաթնաժողովն էլ ավելի է հիասթափեցրել հանածո վառելիքի հակառակորդներին:
