Փաշինյանի նոր գաղափարախոսությունը բախվում է ընդդիմությանը՝ երեք ուղղություններով․ Eurasianet
Վարչապետ Նիկոլ Փաշինյանը երկիրը տանում է գաղափարական վերափոխման՝ հաստատելու այն, ինչ նա անվանում է «իրական Հայաստան»։ Հաջողության հասնելու համար նա պետք է հաղթի երեք ճակատով պայքարում՝ հաղթահարելու Ադրբեջանի, Ռուսաստանի և ներքին քննադատների ընդդիմությունը․ գրել է Eurasianet–ը:
Փաշինյանի խոսքով՝ «իրական Հայաստանի» գաղափարախոսության դրույթները դեռևս մարմնավորվում են, սակայն ընդհանուր ուրվագիծն արևմտյան, ժողովրդավարացված ազգի առաջխաղացումն է, որը գիծ է քաշել անցյալի վրա և հաստատակամորեն ամրագրված է բարգավաճ ապագա կերտելու վրա: Ղարաբաղյան երկրորդ պատերազմում Ադրբեջանից կրած պարտությունը հանգեցրել է Ռուսաստանի հետ երկրի ավանդական ռազմավարական գործընկերության փլուզմանը։
Շատ հայերի կարծիքով՝ ՌԴ–ն չի կատարել Հայաստանի ինքնիշխանությունը պաշտպանելու անվտանգության պարտավորությունները: Այդ ժամանակվանից Փաշինյանը ձգտել է ամրապնդել կապերը ԱՄՆ–ի և Եվրոպայի քաղաքական, տնտեսական և անվտանգության ինստիտուտների հետ՝ միաժամանակ ձգտելով խաղաղության համաձայնագիր կնքել Ադրբեջանի հետ։ Փաշինյանը կարող է ունենալ Միացյալ Նահանգների և Ֆրանսիայի, ինչպես նաև բազմաթիվ պատգամավորների աջակցությունը, բայց թե որքա՞ն հեռու է նա «իրական Հայաստանի» նախագծի իրականացումից, անորոշ է՝ հաշվի առնելով ընդդիմության շրջանակը, որին նա բախվում է երեք ուղղություններից:
Ռուսաստանը՝ ներկայումս Հայաստանի հիմնական առևտրային գործընկերը, կտրականապես դեմ է երկրի՝ դեպի արևմտյան աշխարհաքաղաքական ճամբար տեղափոխվելու ջանքերին, հատկապես՝ ԵՄ–ին անդամակցելուն։ Հայաստանը շարունակում է մնալ Եվրասիական տնտեսական միության անդամ՝ Կրեմլին տալով Երևանի վրա տնտեսական լծակներ: Հաջորդը հայ–ադրբեջանական խաղաղության գործընթացն է, որը մինչև վերջերս թվում էր, որ գայթակղիչ կերպով մոտ է ավարտին հասնելուն, սակայն այժմ ընթանում է այլ ուղղությամբ: Երկու կողմերն էլ վերջին շրջանում փոխանակվել են զինված հակամարտությունը վերսկսելու վերաբերյալ մեղադրանքներով։
Իսկ փետրվարի 13-ին Բաքուն նոր հայց ներկայացրեց Հաագայի Միջազգային արբիտրաժային դատարան՝ «խնդրելով պատասխանատվության ենթարկել Հայաստանին Ղարաբաղում բնապահպանական վնաս պատճառելու համար»: Հայաստանին և Ադրբեջանին առնչվող միջազգային դատական գործերի քննության հարցը եղել է այն կետերից մեկը, որը հետաձգել է խաղաղության պայմանագրի ավարտը։ Իրական Հայաստանի տեսլականին, թերևս, ամենավճռական հակազդեցությունը գալիս է Հայաստանի ներսում և Սփյուռքի խմբերի քննադատներից: Դժգոհության հիմնական աղբյուրը Փաշինյանի պատրաստակամությունն է՝ ճանաչելու Ադրբեջանի տևական ինքնիշխանությունը Ղարաբաղի նկատմամբ։
