ՀՀ-ն և Ադրբեջանը փակուղի են մտել «Զանգեզուրի միջանցքում»․ ի՞նչ է դրված բանակցությունների սեղանին․ Независимая Газета
Հայաստանի և Ադրբեջանի իշխանությունները վիճել են, թե կոնկրետ ի՞նչ են քննարկում խաղաղության պայմանագրի նախապատրաստման շրջանակներում, և ինչի՞ շուրջ կսկսեն բանակցել դրա ստորագրումից հետո։ Միևնույն ժամանակ, երկու կողմերն էլ վստահ են, որ բանակցությունների վերջնական փուլը մոտ է. գրել է Независимая Газета-ն։
Ադրբեջանի խորհրդարանի փոխնախագահ Զիյաֆաթ Ասկերովը հայտարարել է, թե «ԱՄՆ նախկին նախագահ Ջոզեֆ Բայդենի ճնշման ներքո Հայաստանի իշխանությունները հետաձգել են փաստաթղթի ստորագրումը»։
Միաժամանակ, քաղաքական գործիչն ընդգծել է, որ կողմերին մնացել է համաձայնության երկու կետ՝ այսպես կոչված «Զանգեզուրի միջանցքի» բացումը և Հայաստանի Սահմանադրության փոփոխությունները։
«Այսօրվա դրությամբ՝ համաձայնագրի 17 կետերից 15-ը համաձայնեցված են։ Չլուծված կետերից մեկը Զանգեզուրի միջանցքի բացումն է», – նշել է Ասկերովը։
Իր հերթին,Երևանը հերքել է այդ կետերի քննարկումը՝ խաղաղության պայմանագրի նախապատրաստման համատեքստում։ «Վերոնշյալը բացարձակապես չի համապատասխանում իրականությանը։ Ինչպես հրապարակավ հայտարարել է վարչապետ Փաշինյանը, երկու կետերը, որոնք դեռ համաձայնեցված չեն, մի կողմից վերաբերում են սահմանին երրորդ ուժերի տեղակայմանը, մյուս կողմից՝ միջազգային իրավական կառույցներում միմյանց դեմ ներկայացված բողոքներին։ Դա հաստատել է նաև պաշտոնական Բաքուն»,- հայտարարել է Հայաստանի խորհրդարանի փոխխոսնակ Ռուբեն Ռուբինյանը։
Միջազգային հարաբերությունների վերլուծության կենտրոնի խորհրդի նախագահ Ֆարիդ Շաֆիևը НГ-ին հայտնել է, որ իրականում խաղաղության պայմանագրի նախագծում համաձայնեցված չէ միայն երկու կետ։ Սակայն նա չգիտի, թե ինչու՞ է Ասկերովը որոշել, որ դրանք վերաբերում են «Զանգեզուրի միջանցքին» և Հայաստանի Սահմանադրության փոփոխություններին։ «Խոսքը հայցերը փոխադարձ հետ կանչելու և սահմանին երրորդ անձանց առկայության մասին է։ Ընդ որում` բանավոր մակարդակով Երևանն արդեն պայմանավորվել է Բաքվի հետ, որ պահանջներ չպետք է լինեն։ Հավանաբար, այս կետի մանրամասները դեռ պետք է համաձայնեցվեն։ Ինչ վերաբերում է սահմանին երրորդ ուժերի առկայությանը, ապա դեռ վաղ է խոսել համաձայնության մասին»,- պարզաբանել է Շաֆիևը։
Միաժամանակ, թեև խաղաղ բանակցությունների շրջանակներում Հայաստանի Սահմանադրության փոփոխությունը չի քննարկվում, Բաքուն դեռ սպասում է դրան, պարզաբանել է քաղաքագետը։ Հիշեցնենք, որ 2024 թվականի վերջին Ադրբեջանի նախագահ Իլհամ Ալիևը հայտարարել է, որ Երևանն ու Բաքուն դեռ չեն կարողանում պայմանավորվել միմյանց նկատմամբ միջազգային պահանջներից հրաժարվելու և սահմանին երրորդ երկրների ներկայացուցիչներ չտեղակայելու շուրջ։ Ինչպես նաև, Ադրբեջանի հատուկ դեսպան Էլչին Ամիրբեկովը հայտարարել էր, որ կողմերը համաձայնության են եկել խաղաղության պայմանագրի ստորագրումից հետո լուծել հաղորդակցությունների բացման հարցը։
