ԱՄՆ-ն, Սաուդյան Արաբիան, Թուրքիան և Սիրիան քննարկել են Սիրիայի դեմ պատժամիջոցների վերացումը, Ուկրաինայի և Գազայի հարցերը

ԱՄՆ նախագահ Դոնալդ Թրամփը, Սաուդյան Արաբիայի թագաժառանգ Մուհամմեդ բին Սալմանը, Թուրքիայի նախագահ Ռեջեփ Թայիփ Էրդողանը և Սիրիայի ժամանակավոր նախագահ Ահմեդ ալ-Շարաան քննարկել են Ուկրաինայի հակամարտությունը և Գազայի հատվածում ստեղծված իրավիճակը, X սոցիալական ցանցում հայտնել է Սպիտակ տան մամուլի քարտուղար Քերոլայն Լևիթը։

«Այսօր նախագահ Թրամփը, թագաժառանգ Մուհամմեդ բին Սալմանի հրավերով, հանդիպել է Սիրիայի նախագահ Ահմադ ալ-Շարաայի հետ։ Թուրքիայի նախագահ Էրդողանը միացել է հեռախոսազրույցին։ Նախագահ Էրդողանը գովաբանել է նախագահ Թրամփին Սիրիայի նկատմամբ պատժամիջոցները վերացնելու համար և հանձնառություն է հայտնել համագործակցելու Սաուդյան Արաբիայի հետ՝ Սիրիայում խաղաղությունն ու բարգավաճումը խրախուսելու համար։ Թագաժառանգը ևս գովաբանել է նախագահ Թրամփին պատժամիջոցները վերացնելու որոշման համար՝ այն անվանելով քաջարի։ Նախագահ Թրամփը շնորհակալություն է հայտնել նախագահ Էրդողանին և թագաժառանգին բարեկամության համար և ասել նախագահ ալ-Շարաային, որ ինքը հսկայական հնարավորություն ունի իր երկրում պատմական բան անելու։ Նախագահ Թրամփը խրախուսել է նախագահ Ալ-Շարաային մեծ աշխատանք կատարել Սիրիայի ժողովրդի համար և

1. ստորագրել Աբրահամի համաձայնագրերը Իսրայելի հետ,
2. հորդորել բոլոր օտարերկրյա ահաբեկիչներին լքել Սիրիան,
3. արտաքսել պաղեստինցի ահաբեկիչներին,
4. օգնել Միացյալ Նահանգներին՝ կանխելու Իսլամական պետության (ISIS)-ի վերածնունդը,
5. ստանձնել Սիրիայի հյուսիս-արևելքում ISIS-ի կալանավայրերի պատասխանատվությունը։

Նախագահ Ալ-Շարաան շնորհակալություն է հայտնել նախագահ Թրամփին, թագաժառանգին և նախագահ Էրդողանին հանդիպումը կազմակերպելու ջանքերի համար և նշել իրանցիների կողմից Սիրիայից հեռանալու ընձեռած նշանակալի հնարավորությունը, ինչպես նաև ԱՄՆ-Սիրիա շահերի համընկնումն ահաբեկչության դեմ պայքարի և քիմիական զենքի վերացման գործում: Նախագահ Ալ-Շարաան հաստատել է իր հանձնառությունը 1974 թվականի Իսրայելի հետ տարանջատման համաձայնագրին: Նախագահ Ալ-Շարաան եզրափակել է իր ելույթը՝ հույս ունենալով, որ Սիրիան կծառայի որպես կարևոր օղակ Արևելքի և Արևմուտքի միջև առևտրի խթանման գործում՝ հրավիրելով ամերիկյան ընկերություններին ներդրումներ կատարել սիրիական նավթի և գազի ոլորտում: Քննարկվել են նաև Ռուսաստան-Ուկրաինա և Գազայի պատերազմները»: