ՀՀ-ում մեկնարկել է ընտրական խառնաշփոթը․ ո՞վ ինչ է ցանկանում և ու՞մ դեմ է պայքարում՝ ըստ ռուսական մամուլի
Մինչև Հայաստանի խորհրդարանական ընտրությունները մնացել է մեկ տարուց էլ պակաս։ Դրանք տեղի կունենան 2026 թվականի հունիսի 7-ին: Երկրի բոլոր քաղաքական ուժերն արդեն միացել են ընտրարշավին․ գրել է Независимая Газета-ն։
Ինչպես նշվել է, վարչապետ Նիկոլ Փաշինյանն առայժմ ամենաակտիվն է։ Մասնավորապես, նա հարձակում է սկսել Հայ Առաքելական Եկեղեցու (ՀԱԵ) դեմ՝ պահանջելով կաթողիկոս Գերեգին Բ-ի հրաժարականը, ով հայկական էլիտայի վերջին ներկայացուցիչն է, որ պահպանել է իր պաշտոնը թավշյա հեղափոխությունից ի վեր։
Վարչապետի խոսքով՝ եկեղեցու առաջնորդն ունի ապօրինի զավակ, իսկ կուսակրոնությունը խախտած քահանան իրավունք չունի միջնորդ լինել ժողովրդի և Աստծո միջև։ Ի պատասխան՝ եկեղեցին մեղադրել է Փաշինյանին հայ ազգի հիմքերից մեկը ոչնչացնելու փորձի մեջ։ Ավելին, ՀԱԵ-ն չի բացառել, որ Հայաստանի ղեկավարը կարող է գործել Ադրբեջանի շահերից ելնելով։ Ընդդիմությունը բռնել է եկեղեցականների կողմը։ Օրինակ՝ նախկին նախագահ Սերժ Սարգսյանի Հանրապետական կուսակցությունը մատնանշել է Փաշինյանի գործողությունների և Բաքվի միջև կապը։ Բացի այդ՝ ՀՀ առաջին նախագահ Լևոն Տեր-Պետրոսյանը հանդիպել է Գարեգին Բ-ի հետ և վստահեցրել նրան իր աջակցության մեջ։ Միևնույն ժամանակ՝ նա կտրականապես դատապարտել է «ՀՀ իշխանությունների հակասահմանադրական ոտնձգությունները 1700-ամյա եկեղեցու նկատմամբ»։
Սակայն, ինչպես նկատել է կայքը, Փաշինյանը սկսել է իր քաղաքական կարիերան որպես Տեր-Պետրոսյանի կողմնակից։ Նա նույնիսկ հույս ուներ դառնալ նրա իրավահաջորդը և գլխավորել է նրա ընտրական շտաբը 2008 թվականի նախագահական ընտրություններում։ Խաղաքարտերը խառնվել են ապագա վարչապետի «Մարտի 1-ի գործով» բանտարկության պատճառով։ Զանգվածային անկարգություններ կազմակերպելու և առաջին նախագահից աջակցություն չստանալու մեղադրանքով կալանավորվելուց հետո՝ Փաշինյանը որոշել է ինքնուրույն գալ իշխանության։ Եկեղեցական հակամարտությանը զուգահեռ՝ ՀՀ կառավարության ղեկավարը շարունակում է փորձել քաղաքական միավորներ վաստակել՝ մերձենալով Ադրբեջանի հետ։ Նախևառաջ, նա ձգտում է խաղաղության պայմանագիր կնքել Բաքվի հետ։
Իր մտադրությունների անկեղծության վերաբերյալ Բաքվի կասկածները ցրելու համար՝ Փաշինյանը Հայաստանի պատմության մեջ առաջին անգամ շնորհավորել է իր հարևաններին Կուրբան Բայրամի կապակցությամբ։ НГ-ն նաև հիշեցրել է, որ անցյալ շաբաթ Հայաստանի խորհրդարանի «Պատիվ ունեմ» ընդդիմադիր խմբակցությունը միաձայն որոշել է առաջարկել անվստահություն հայտնել վարչապետ Նիկոլ Փաշինյանին՝ համաձայն Հայաստանի Ազգային ժողովի կանոնակարգի։
EADaily-ին այս առնչությամբ գրել է, որ նախկին նախագահ Սերժ Սարգսյանի գլխավորած նախկին իշխող Հանրապետական կուսակցությունը (ՀՀԿ) որոշել է վարչապետի թեկնածուի հարցը՝ կառավարության ներկայիս ղեկավար Նիկոլ Փաշինյանին անվստահություն հայտնելու նախաձեռնված գործընթացի շրջանակներում։ Հայտնի է դարձել, որ «Պատիվ ունեմ» ընդդիմադիր խմբակցությունը վարչապետի պաշտոնում կառաջադրի Մասիս համայնքի ղեկավար Դավիթ Համբարձումյանին։ Ինչպես նկատել է կայքը, վարչապետի պաշտոնում ՀՀԿ թեկնածուն քիչ է հայտնի հայ լայն հանրությանը՝ չհաշված արտաքին լսարանը։ «Սակայն, ինչպես կարող եք հասկանալ, Սերժ Սարգսյանի քաղաքական դաշնակիցների և հենց երկրի երրորդ նախագահի համար այս փաստն այդքան էլ կարևոր չէ», – նշվել է հոդվածում։
EADaily-ի ենթադրություններով՝ հաստատվում է այն տարբերակը, որ հանրապետության նախկին ղեկավարի՝ Նիկոլ Փաշինյանի իմպիչմենտի գործընթացի մեկնարկին հասնելու մտադրությունը հետապնդում է մի նպատակ, որը մեծապես տարբերվում է վերջինիս իշխանությունից անմիջականորեն հեռացնելուց: Հայ հանրապետականների առաջնահերթ խնդիրը համակարգային ընդդիմության ճամբարում առաջին տեղը զբաղեցնելը, երկրի նախկին նախագահ Ռոբերտ Քոչարյանի գլխավորած «Հայաստան» խմբակցությանն այս «պատվանդանից» դուրս մղելն է։
«Դավիթ Համբարձումյանն այն քաղաքական «տրամաչափի» և կշռի քաղաքական գործիչ չէ, ով կարող է առաջացնել ընդդիմության աննախադեպ բողոքի ցույց՝ Նիկոլ Փաշինյանին «տապալելու» համար։ Հենց փողոցն էր, որ «թավշյա հեղափոխության» առաջնորդին 2018 թվականի գարնանը բերեց խորհրդարանական հանրապետության ամենաբարձր պետական պաշտոնին։ Հիմա շատ բան է փոխվել, և այդ փոփոխություններն ավելի նուրբ զգում է Ռոբերտ Քոչարյանը, ով իր կողմնակիցներին և համախոհներին նախապատրաստում է «դիրքային մարտերի» 2026 թվականի հունիսի 7-ի ընտրություններից առաջ», – եզրակացրել է կայքը։
