Ժողովրդին բախմա՞ն եք տանում, Հայոց եկեղեցու ամեն սպասավոր առաքյալ է՝ պատրաստ նահատակվելու․ Տեր Ասողիկ քահանա Կարապետյան
Հայաստանի Հանրապետությունում բացահայտ կերպով ահաբեկչություն է ծրագրվում՝ պետական մակարդակով․ ֆեյսբուքյան իր էջում գրել է հայր Ասողիկ Կարապետյանը։
«Ո՞ւր եք Երկրի համապատասխան կառույցներ, որտե՞ղ եք պետական ներկա ու նախկին գործիչներ, պատգամավորներ և մնացյալ հանգամանավոր անձեր… Մի՞թե այդքան կույր եք և այդքան խուլ: Մի՞թե այդքան նվաստ եք, այդքան վաճառված հոգիներ, որ Ձեր նենգ խաղերի սլաքներն ուղղում եք Սուրբ Եկեղեցուն և Սրբություն Սրբոց Մայր Աթոռ Սուրբ Էջմիածնին: Ինչ է, ժողովրդին բախմա՞ն եք տանում: Սուրբ Եկեղեցու բակն արյա՞մբ եք ուզում լցնել․․․
Լսեցեք և կանգ առեք, ապիկարներ, ոչ մի եկեղեցական՝ ամենախոնարհ սպասավորից մինչև բարձրաստիճան, երբեք ձեզ թույլ չի տա պիղծ ձեռքերով ու անձերով Սուրբ Էջմիածնի և նրա Ազգընտիր ու Աստվածարյալ Հայրապետի վրա սուր բարձրացնել:
Հայոց Եկեղեցում հուդաներ չկան, որ վաճառվեն և Տիրոջ Օծյալի դեմ ամբոխի ուղեկցեն: Հայոց Եկեղեցում ամեն մի սպասավոր առաքյալ է՝ պատրաստ նահատակվելու»,-գրել է նա:
Հիշեցնենք, որ Ամենայն Հայոց կաթողիկոսի դեմ ծավալված արշավի շրջանակում այսօր ՀՀ վարչապետ Նիկոլ Փաշինյանը հերթական գրառումն է արել՝ խոստանալով, ապացուցել, որ Գարեգին Բ կաթողիկոսը խախտել է կուսակրոնության ուխտն ու զավակ ունի։
