ՀՀ իշխանությունների քայլերը նախադրյալներ են ստեղծում, որ Բաքուն փոխհատուցման պահանջ ներկայացնի․ Էլինար Վարդանյան
Ադրբեջանի կողմից այդպիսի հայտարարություն առաջին անգամ չի լինում, այսինքն` վերջին մի քանի տարիների ընթացքում պարբերաբար ներկայացվում են հաշվարկներ, իրենց ենթադրյալ վնասների մասին․ ABC media-ի հետ զրույցում ասել է ԱԺ պատգամավոր Էլինար Վարդանյանն՝ անդրադառնալով Ալիևի օգնական Հաջիևի այն հայտարարությանը, թե Հայաստանն Ադրբեջանին 150 մլդր դոլարի վնաս է հասցրել։
Վարդանյանի կարծիքով՝ այսպիսի հայտարարությունները, որոնք պարբերաբար և հետևողականորեն արվում են, ինքնանպատակ չեն։
«Թեև իրենց կողմից նշվող խաղաղության պայմանագրով նախատեսված է միջազգային դատարաններում առկա հայցերից հրաժարում, բայց, միևնույն ժամանակ, ես տեսնում եմ, որ Ադրբեջանը հող է նախապատրաստում հետագա գործողությունների համար, այսինքն՝ որևէ պահի, որևէ բան Ադրբեջանին չի կաշկանդելու միջազգային դատական ատյաններին դիմել և իրենց կողմից հորինված վնասի փոխհատուցում պահանջել։ Մյուս կողմից, այսպիսի հայտարարությունները նաև նախադրյալ են ստեղծում, որ ադրբեջանական իշխանությունը մեր իշխանության համար հերթական անգամ որոշակի գործողություններ կատարելու համար հարկադրանքի միջոցներ ստեղծի»,-ասել է Վարդանյանը։
ԱԺ պատգամավորը չգիտի՝ ինչպիսի իրավական ճանապարհով կգնա Բաքուն, այսինքն՝ արդյոք կգնա՞ն միջազգային արբիտրաժներին դիմելու, թե՞ ՀՀ իշխանության հետ բանակցությունների և պայմանավորվածությունների գնալու ճանապարհով։
«Կանխատեսումներ անել, որ այդ արժեքային գումարի փոխարեն տարածքային պահանջներ կլինեն կամ որևէ այլ պահանջ կլինի, մի փոքր վաղ է, բայց այն, որ այդ հանգամանքը օգտագործվելու է ադրբեջանական իշխանությունների կողմից, որովհետև դրա դիմաց պատշաճ աշխատանք Հայաստանի իշխանությունների կողմից չեն տարվում, ակնհայտ է։ Մեր իշխանությունն այս ընթացքում նույնիսկ պատրաստ է հրաժարվել միջազգային հայցերից, որով կլեգիտիմացնի Ադրբեջանի կողմից Արցախի օկուպացիան, և դրանով իսկ նախադրյալներ կստեղծի հետագայում Ադրբեջանի՝ արդեն ֆինանսական հայցերի համար։ Մեկը մյուսի հետ անմիջականորեն կապված են։ Երբ դու միջազգային դատարանից հրաժարվում ես, դատարանից հետ ես կանչում հայցդ և դիտարկում ես, որ եղել է «Արցախի օկուպացիա», իսկ Ադրբեջանի կողմից ագրեսիվ գործողություններ չեն եղել, դրանով իսկ արդեն նախադրյալներ ես ստեղծում, որ կարելի է դիմել փոխհատուցման պահանջով»,-եզրափակել է պատգամավորը։
